Qaraǵandy oblysynda 90-jyldary bos turǵan úılerge qonystanǵandar olardy menshikteı alady
ASTANA. QazAqparat - 90-jyldary bos turǵan úılerge óz erikterimen kirip alǵan azamattar endi olardy menshikteı alady. Bul týraly búgingi brıfıngte Abaı aýdany prokýrorynyń mindetin atqarýshy Aıdar Dosmaqov málim etti, dep habarlaıdy Qaraǵandy oblysy ákimdiginiń baspasóz qyzmeti.
- Bizdiń ortalyqtar men aýyldarda azamattardyń 1990-2000-shy jyldary bos turǵan páterlerge kirip, onda uzaq ýaqyt turyp jatqan jaǵdaılary kóptep kezdesedi, - deıdi ol. - Biraq bir másele bar, ol azamattar páterdi óz atyna aýdara almaıdy. Egerde páterdiń burynǵy ıesi paıda bolsa, onda qanshama jyl osy páterde turyp, ony baptap kútken azamattar páterden shyǵarylady.
Osyndaı azamattardyń múddesin qorǵaý úshin Abaı aýdanynyń prokýratýrasy qanshama jyl páterde turyp, oǵan jóndeý jumystaryn jasaǵan adamdarǵa sol páterdi menshigine alýǵa múmkindik týdyratyn mehanızmdi oılap tapty. Qaraǵandy oblysynyń sottary osy algorıtmmen tanysyp, onymen kelisti.
Úıdi jekeshelendirýdiń eki joly bar. Eger turǵyn úıdiń burynǵy ıesi anyqtalmasa, onda páterdi kommýnaldyq jekemenshikke ótkizý kerek, keıin jaldaý shartyn rásimdep, ary qaraı úıdiń qaldyq baǵasyn tólep jekeshelendirýge bolady. Al eger páter ıesi belgili bolsa, onda óz erkimen páterde turyp jatqan azamattar páter ıesiniń quqyn toqtatý boıynsha ótinishpen jergilikti atqarýshy mekemege barýlary tıis. Osydan keıin turǵyn úıdi kommýnaldy jeke menshikke ótkizip, ary qaraı jekeshelendirý úshin jaldaý shartyn jasaýlary kerek.
Prokýrordyń sózinshe, bul syzba is júzinde synaqtan ótken.
- Abaıda biz 15 jyl buryn óz erkimen bos páterge kirip alǵan azamatshany taptyq, - deıdi ol. - Jalǵyz basty ana tórt balany asyrap otyr. Ol turaqty túrde kommýnaldyq qyzmetter tólemin tólep, osy jyldar boıy páterdi jóndep otyrǵan. Onyń atynan biz páterdi kommýnaldy jeke menshikke ótkizýge, keıin jaldaý shartyn rásimdeýge ótinish berdik. Osylaısha, shart merzimi aıaqtalǵan soń azamatsha Ivanova páterdi jekeshelendire alady. Іs barysynda aýdan ákiminiń orynbasary men TÚKSh mamany Ivanovanyń syrtynan onyń pátirin jekeshelendirip alǵandyǵy anyqtaldy. Qazir olar qylmystyq jaýapqa tartyldy jáne memlekettik qyzmette qyzmet etý quqyǵynan aıyryldy.
Ázirge bul algorıtm tek Qaraǵandy oblysynda ǵana qoldanylýda. Biraq bolashaqta ol respýblıka boıynsha taralýy múmkin.
