Qaraǵandy oblysynda 84 jastaǵy aqsaqal traktormen aýyl joldaryn qardan tazartýda
Mınnıagzam Avlııarov Bashqurtstanda dúnıege kelgen jáne jas kezinde Qazaqstanǵa tyń jerlerdi ıgerýge kelgen. Tikenekti aýylynda turyp, uzaq jyldar mehanızator bolyp jumys istegen. Kombaın, traktor jáne basqa da arnaıy tehnıkany tizgindep, elge qyzmet kórsetken. Munda ol úılenip, jubaıymen birge bes bala – úsh qyz ben eki ul tárbıelep ósirdi. Aýyl turǵyndary aqsaqaldy Aǵzam aǵa dep atap ketken. Zeınetker ómir boıy qys túskende aýyldyń qaryn kúrep, kóktemde bógetterdi nyǵaıtýmen aınalysyp keledi.
Zeınetke shyqqannan keıin de Aǵzam aǵa qol qýsyryp otyra almaǵan. Halyq arasynda belsendi azamattyq ustanymy úshin oǵan «kúmis volonter» jáne «sýpermen» degen laqap at berilgen.
«Qazaqstanǵa 1958 jyly, 19 jasymda tyń jerlerdi ıgerýge keldim. 1961 jyly meni osynda jiberdi. Ol kezde myna jerler qý dala bolatyn, men sovhoz qurylysyna qatystym. Sodan beri osynda turamyn. Tikenekti – bul meniń Otanym. Aýyldastaryma shyn júrekten kómektesemin. Alla Taǵala maǵan kúsh-qýat bergendikten, adamdarǵa kómektesýim kerek dep sanaımyn. Sonymen qatar qazir bizdiń aýylda kóbine qarttar ǵana qaldy. Aýylymyzdy qar basyp ketkende, olarǵa júrip-turý qıynǵa soǵady», – deıdi aqsaqal.
Aýyl ákimi Erlan Ospanov Aǵzam ata osyndaı azamattyq ustanymymen jastarǵa úlgi kórsetip otyr dep sanaıdy.
«Aǵzam aǵany bárimiz qurmetteımiz. Ol kisi jergilikti halyqqa qyryq jyl boıy kómektesip keledi. Onyń shaǵyn sharýa qojalyǵy bar. Qysta qar kúreıdi, jazda jergilikti turǵyndarǵa shóp jınaýǵa kómektesedi. Bıyl qonys aýdarý baǵdarlamasy boıynsha Pavlodar oblysynan osynda kóshirip ákelemiz dep otyrǵan otbasyǵa kómek kórsetýge daıyn. Ol kópbalaly otbasy, olarǵa sharýa qojalyqtarynyń basqa basshylary da kómek kórsetedi. Al aqsaqalǵa zor densaýlyq tileımiz. Dál osyndaı adamdar bizdiń jastarymyzǵa úlgi bolýy kerek», – deıdi Erlan Ospanov.
Tikenekti aýylynda búgingi tańda 226 adam turady. Eldi meken aýdan ortalyǵynan 320 shaqyrym jáne Qaraǵandydan 550 shaqyrym jerde ornalasqan.
