Qaraǵandy oblysynda 83 sý aıdynynda shomylýǵa ruqsat berildi
QARAǴANDY. QazAqparat - Qaraǵandy oblysynda 83 sýda júzýge bolatyn demalys oryny anyqtaldy. Qaraǵandyda ol mádenıet jáne demalys saıabaǵyndaǵy kól jáne Fedorov sý qoımasyndaǵy qalalyq jaǵajaı bolady, dep habarlaıdy QazAqparat tilshisi.
Qaraǵandy oblysynyń TJD qyzmetkerleri sýǵa shomylý maýsymyna daıyndyq boıynsha kóshpeli brıfıng ótkizdi.
«Maýsym bastalar aldynda shomylýǵa arnalǵan oryndar tazartylýy tıis. Sý túbin arnaıy tazartýdy bizdiń súńgýshiler júrgizedi. Sýǵa shomylý maýsymynyń oqys oqıǵasyz ótýin qamtamasyz etý boıynsha barlyq is-shara oblys ákimi bekitken josparǵa sáıkes júzege asyrylady. Oblysta shomylýǵa arnalǵan 83 oryn anyqtaldy. Eger Qaraǵandy týraly aıtatyn bolsaq, bul mádenıet jáne demalys saıabaǵy men Fedorov sý qoımasyndaǵy qalalyq jaǵajaı. Sondaı-aq biz shomylýǵa tyıym salynǵan jerlerdi anyqtaımyz. Olardyń sany oblysta 271», - deıdi TJD bastyǵynyń orynbasary Murat Qatpanov.
Qaraǵandy oblysynda sýǵa shomylý maýsymyna daıyndyq jumystary júrgizilip jatyr. Búgin Fedorov sý qoımasynda súńgýshi qutqarýshylar sýǵa shomylýǵa arnalǵan sý aıdyndarynyń túbin tekserdi.
«Biz sýdyń túbin tazalaımyz, onda adamdardy jaraqattaıtyn bóten zattar bolýy múmkin. Bul sýǵa shomylý maýsymy aldynda ótkiziletin jyl saıynǵy kezekti tekserý. Asa qaýipti zattardy tappadyq, sondyqtan jaǵajaı sýǵa túsýge jaramdy», - dep túsindirdi Qaraǵandy oblysy TJD qutqarý jasaǵynyń bas qutqarýshysy Sergeı Tselıshev.
30 sáýirden bastap TJD-nyń barlyq sýda qutqarý bólimsheleri joǵary daıyndyq jaǵdaıyna kóshirilgen. Oblysta osyndaı jeti bólimshe bar. Olar arnaıy apattyq-qutqarý tehnıkasymen, súńgýshi jabdyqtarymen jabdyqtalǵan. Qazirgi ýaqytta qutqarýshylar adamy kóp demalys oryndaryn patrýldeıdi.
