Qaraǵandy oblysynda 800-ge jýyq adam kóligimen jolda qalyp qoıdy
QARAǴANDY. QazAqparat - Qaraǵandy oblysynyń Tótenshe jaǵdaılar departamenti óńirdegi aýa raıyna qatysty jaǵdaı týraly málimdedi. Oblys aýmaǵynda respýblıkalyq mańyzy bar joldardyń 10 ýchaskesi jabyldy, dep habarlaıdy QazAqparat tilshisi.
Qaraǵandy oblysynda qalyń qar, qatty jel, joldyń kórinbeýine baılanysty avtokóliktiń barlyq túrleri úshin Respýblıkalyq mańyzy bar avtojoldardyń 10 ýchaskesinde qozǵalys jabyldy.
«17 beket qoıyldy, 466 birlik tehnıka (293 júk, 172 jeńil jáne 1 avtobýs) qozǵalysy toqtatyldy. Atalmysh kólikterde 760 adam bar. Osakarovka kentinde 15 adam jáne Nura kenti kolledjiniń Nura jataqhanasyna 7 adam ornalastyryldy», - dep habarlady Qaraǵandy oblysy TJD baspasóz qyzmeti.
Óńirde 6 avarııalyq-qutqarý jumystary júrgizildi. Qutqarýshylar Sátbaev qalasynda - 1 (8 adam, onyń ishinde 2 bala), Jezqazǵan qalasynda - 1 (7 adam, onyń ishinde 2 bala), Osakarov aýdanynda - 1 (15 adam), Nura aýdanynda - 2 (5 adam) Qaraǵandy qalasynda - 1 (3 adam) shaqyrtýǵa shyǵyp, qutqarý operatsııasyn ótkizdi. Sonyń nátıjesinde 38 adam, onyń ishinde 4 bala qutqaryldy jáne 3 birlik tehnıka qar qursaýynan alyp shyǵaryldy.
TJM bólimsheleri men jergilikti atqarýshy organdardyń kúshteri men quraldary jumyldyryldy.
«Qazgıdromet» RMK derekteri boıynsha 15 aqpanda Qaraǵandy oblysynyń soltústiginde, shyǵysynda burqasyn bolady. Ońtústik-batystan, batystan jel soǵady, soltústikte, shyǵysta jel ekpini 15-20 m/s jetedi.
Qaraǵandy qalasynda 15 aqpanda boran soǵady. Ońtústik-batystan, batystan jel soǵyp, ekpini 15 m/s jetedi.
Jezqazǵanda búgin túnde jel ekpini 15 m/s deıin jetedi.
