Qaraǵandy oblysynda 80 jastaǵy zeınetker qaraqshyny soqqyǵa jyqqan
30 mamyrda Qaraǵandy oblysy Saran qalasynyń polıtsııa bólimine 80 jastaǵy áıel túrli jaraqattarmen medıtsınalyq mekemege jatqyzylǵany týraly habarlama túsken. Polıtseıler anyqtaǵandaı, zeınetker dene jaraqatyn qaraqshyǵa qarsylyq kórsetý kezinde alǵan.
Ájeıdiń aıtýynsha, tańerteń ol shirkeýge bet alyp, eki úıdiń arasynan ótip bara jatqanda, oǵan belgisiz adam shabýyl jasaǵan. Kúsh qoldana otyryp, keıýanadan sómkesin tartyp almaq bolǵan. Alaıda zeınetker esh qoryqpastan qaraqshyǵa tótep bergen, ony birneshe ret uryp jibergen. Keıin ózi qulap qalyp, jaraqat alǵan. Mundaı qatty toıtarysty kútpegen qaraqshy qashyp ketken.
«Atalǵan fakti boıynsha QR QK 191-baby («Tonaý») boıynsha qylmystyq is qozǵaldy. 1 maýsymda jedel-izdestirý sharalary barysynda krımınaldyq polıtsııa qyzmetkerleri kúdiktini – 25 jastaǵy er adamdy ustady. Ol kinásin tolyq moıyndady. Tergeý júrip jatyr», - dep habarlady Qaraǵandy oblysy PD baspasóz qyzmetinen .