Qaraǵandy oblysynda 8 jańa bilim berý nysany paıdalanýǵa berilmek
QARAǴANDY. QazAqparat - Bilim berý sapasyn arttyrý, dástúrli oqýǵa qaıta oralý – bul máseleler Qaraǵandy oblysy pedagogtarynyń dástúrli tamyz keńesinde talqylandy, dep habarlaıdy QazAqparat tilshisi.
«Búgin bilim berý sapasyn qamtamasyz etýdegi óńirlik mazmun máselelerin talqylaımyz. Erekshe kezeńge qaramastan, júıeni jetildirýge kóp kóńil bólinedi. Bıyl bilim berýge 182 mlrd teńge bólindi, bul oblystyń jalpy bıýdjetiniń 40%-y. Óńirde 11 bilim berý nysanynyń qurylysy júrgizilýde: Qaraǵandy, Jezqazǵan, Saran qalalarynda, Jańaarqa jáne Shet aýdandarynda 4 mektep jáne 4 japsarlas qosymsha qurylys, Jezqazǵan men Sátbaev qalalarynda 2 balabaqsha, Sátbaev qalasyndaǵy Oqýshylar saraıynyń qurylysy júrgizilýde. Jyl sońyna deıin 8 nysandy iske qosýdy josparlap otyrmyz», – dedi oblys ákimi Jeńis Qasymbek onlaın-keńesti asha otyryp.
Oblys ortalyǵynda 1 qyrkúıekte jańa Oqýshylar saraıy ashylady.
Jańa oqý jylyna qaraı 164 bilim berý nysandarynda jóndeý jumystary júrgizildi. Balalardyń qaýipsizdigin qamtamasyz etý boıynsha úlken jumys atqaryldy. Barlyq oqý oryndarynda dabyl túımeleri men daýystyq eskertý júıeleri paıda boldy. Jartysynan kóbi týrnıkettermen jabdyqtalǵan, sondaı-aq arnaıy kúzet kezekshilik etetin bolady. Qańtar aıynan bastap barlyq beınebaqylaý júıesin jańartý bastalady.
Balabaqshalarda ata-analar mektepke deıingi tárbıe sapasyn baǵalaıtyn jańa úlgi engiziledi.
Keńeske qatysýshylar jańa jobalar men bastamalar týraly áńgimeleıdi. Tikeleı efırdiń arqasynda kezdesý myńdaǵan mamandar men ata-analar aýdıtorııasyn jınady. Nur-Sultan qalasynan efırge Y.Altynsarın atyndaǵy Ulttyq bilim akademııasynyń prezıdenti Ǵanı Beısembaev, QR BǴM Respýblıkalyq qosymsha bilim berý oqý-ádistemelik ortalyǵynyń dırektory, bilim mınıstriniń Balalardyń quqyqtaryn qorǵaý máseleleri jónindegi keńesshisi Raısa Sher qosyldy.
