Qaraǵandy oblysynda 8 páterli turǵyn úı janyp ketti, bir bala kóz jumdy
ASTANA. 5 jeltoqsan. QazAqparat - 4 jeltoqsan kúni, saǵat 15.18-de Qaraǵandy oblysy Balqash qalasynyń Qońyrat kentinde eki qabatty 8 páterli turǵyn úıde órt boldy.
QR TJM-niń baspasóz qyzmetinen habarlanǵandaı, órt tolyǵymen 5 saǵattan keıin sóndirildi. Tilsiz jaý barlyq 8 páterdi sharpydy, turǵyndar ýaqytsha týystary men tanystaryna ornalastyryldy.
Jalyndy aýyzdyqtaýǵa Qaraǵandy oblysy boıynsha TJD órtke qarsy qyzmetiniń 26 adamy men 6 tehnıkasy, QR TJM «Órt sóndirýshi» AQ Qaraǵandy fılıalynyń 8 adamy men 2 tehnıkasy jumyldyryldy.
Órt ornynda 6 jastaǵy balanyń máıiti tabyldy, 2 adam aýrýhanaǵa jetkizildi.
