Qaraǵandy oblysynda 8 aýmaqtan shyqqan órtti sóndirý jalǵasýda
Qaraǵandy oblysynda aýa raıynyń ystyq bolýyna jáne qatty jel soǵýyna baılanysty joǵary órt qaýipsizdigi saqtalyp otyr.
Shet aýdanynda, Qyzyltaý aýylynan 12 shaqyrym jerde 5 qyrkúıekte qurǵaq shóp órtendi. Ot 300 ga jerdi sharpydy, osy aýdannyń Nurataldy aýyldyq okrýginde, Shopa aýylynan 25 shaqyrym jerde, 6 qyrkúıekte bastalǵan dala órtin joıý jalǵasýda. Aldyn ala málimetter boıynsha, bul ýchaskede órt aýmaǵy 1000 ga qurady. Sondaı-aq dala órti Nura aýdany, Qaraqoıyn aýyldyq okrýginiń Kereı aýylynan 50 km qashyqtyqta oryn alǵan. Aldyn ala derekter boıynsha qurǵaq shóptiń janý alańy 200 ga qurady.
Buqar Jyraý aýdanynda, Belaǵash ormanshylyǵynyń aýmaǵynda, Tórtkól aýylynan soltústik-shyǵysqa qaraı 20 km jerde, 6 qyrkúıekte saǵat 16:40-ta qurǵaq shópter men aǵashtar órtendi. Orman órtiniń boljamdy aýdany – 10 ga. Shet, Qarqaraly jáne Nura aýdandarynda áli de dala aýmaǵy órtenýde.
«Barlyq órt oshaqta TJD, jergilikti atqarýshy organdardyń erikti órt sóndirý quramalarynyń jáne ormanshylyqtardyń kúshteri jumyldyryldy. Jalyndy sóndirýge 362 adam men 83 tehnıka jumyldyryldy», – dep habarlady TJD.
