Qaraǵandy oblysynda 77 saýda núktesinde áshekeı buıymdary synamalyq tańbasyz satylǵan

ASTANA. QazAqparat – Qaraǵandy oblysynda 77 kásipkerlik sýbektisi «Baǵaly metaldar men asyl tastar týraly» QR Zańyn buzdy, dep habarlaıdy QazAqparat Saýda jáne jáne ıntegratsııa mınıstrligine silteme jasap.

«Qaraǵandy oblysynda zergerlik buıymdardy satý salasyna barmaı-aq, profılaktıkalyq baqylaý kezinde «Baǵaly metaldar men asyl tastar týraly» Qazaqstan Respýblıkasynyń Zańyn buzý derekteri anyqtaldy.

Memlekettik kirister organdary usynǵan málimetterdi, statıstıkany ýákiletti uıymdardyń derekterimen zerdeleý, taldaý, salystyrý zań buzýshylyqtar zergerlik jáne basqa da buıymdardy synamalyq tańbasy, sondaı-aq ataýly tańbanyń bederi bolmaı satý túrinde jasalǵanyn kórsetti, - delingen vedomstvonyń baspasóz málimdemesinde.

Atap kórsetilgenindeı, zańnamaǵa sáıkes zergerlik jáne basqa da buıymdar ýákiletti uıymdardyń kodtary bar Qazaqstan Respýblıkasynyń biryńǵaı synamalyq tańbasymen tańbalanady.

«Tehnıkalyq retteý salasyndaǵy ýákiletti organ vedomstvosynyń aýmaqtyq bólimshesi 77 kásipkerlik sýbektisine qatysty zań buzýshylyqtardy ýaqtyly jolyn kesý jáne boldyrmaý, satýshylarǵa buzýshylyqtardy óz betinshe joıý quqyǵyn berý úshin anyqtalǵan buzýshylyqtardy sıpattaı otyryp, habarlama resimdedi jáne jiberdi», - dep habarlaıdy mınıstrlikten.

Foto: media.vietq.vn