Qaraǵandy oblysynda 7 JEO-da aýqymdy jóndeý júrgiziledi
«Jańa jylytý maýsymynyń aldynda Qaraǵandy oblysynda 7 jylý-elektr ortalyǵynda aýqymdy jóndeý naýqany ótedi. 45 qazandyq pen 29 týrbınany jóndeý josparlanǵan. Sondaı-aq óńirde 88 km jylýmen jabdyqtaý jelileri men 1937 km elektr jelileri aýystyrylady», - dedi Qaraǵandy oblysynyń ákimi Ermaǵanbet Bólekpaev.
Ermaǵanbet Bólekpaev turǵyn úılerdi sapaly jáne úzdiksiz jylýmen qamtamasyz etý úshin qandaı jumystar atqarylyp jatqany jaıly búgin Ortalyq kommýnıkatsııalar qyzmetinde ótken brıfıngide aıtyp berdi.
Bıyl Temirtaýda 29 shaqyrym jylý qubyryn aýystyrý josparlanýda. JEO-2-de jabdyqtardy aǵymdaǵy jóndeý jáne qalaǵa qajetti jetinshi qazandyqtyń qurylysy júrip jatyr.
«Ótken jyl Temirtaý turǵyndary úshin óte qıyn boldy. Qala boıynsha 29 km jylý jelilerin jóndeý josparlanýda.»ArselorMıttal Temirtaý«kompanııasyna tıesili JEO-2 jumysyna shaǵym túsip jatyr. Qazirgi ýaqytta stantsııada qazandyqtardy jóndeý naýqany jáne jańa – 7-inshi qazandyqtyń qurylysy júrip jatyr. Bul rette biz óz tarapymyzdan jumystardyń tıisti merzimde aıaqtalýy úshin barlyq qajetti sharalardy qabyldaımyz», - dedi Ermaǵanbet Bólekpaev.
Qaraǵandyda turǵyn úı qurylysynyń belsendi bolýyna baılanysty jylý tapshylyǵy baıqalady. Bul máseleni sheshý úshin oblys ortalyǵynda úshinshi jylý qubyrynyń qurylysy jalǵasyp jatyr. Bul jańa shaǵyn aýdandardy sapaly jylýmen qamtýǵa múmkindik beredi.
Sondaı-aq halyqty sapaly aýyzsýmen qamtamasyz etý máselesi kezeń-kezeńimen sheshilýde. 2025 jylǵa qaraı bılik oblys turǵyndaryn ortalyqtandyrylǵan sýmen 100% qamtýdy josparlap otyr.
