Qaraǵandy oblysynda 7-synyp oqýshysy Sáken Seıfýlınniń 70 óleńin jatqa oqydy
QARAǴANDY. QazAqparat - Qaraǵandy qalasynda S. Seıfýllın atyndaǵy teatrdyń sahnasynda «Sáken oqýlary» atty birinshi oblystyq mánerlep oqý saıysy ótti, dep habarlaıdy QazAqparat.
Oǵan oblys boıynsha 50-ge jýyq oqýshy qatysty.
Bıylǵy jyly Qazaq ádebıetiniń negizin salýshy, aqyn, jazýshy, memleket qaıratkeri Sáken Seıfýllınniń týǵanyna 125 jyl tolady. Osy kúnge oraı oblysta alǵash ret Sáken oqýlary uıymdastyryldy.
«Oblystyq týrǵa eń úzdik, aýdandyq jáne qalalyq kezeńderdiń jeńimpazdary qatysady», - dedi sharanyń ashylý saltanatynda Qaraǵandy oblysy Bilim basqarmasynyń basshysy Esenǵazy Imanǵalıev.
Baıqaýǵa 7-10 synyp oqýshylary qatysty. Olar «Syr sandyqty ashyp qara» jáne «Sákenniń án sandyǵy» nomınatsııalary boıynsha óner kórsetti.
Birinshi nomınatsııa boıynsha qatysýshylar Sáken Seıfýllınniń shyǵarmalaryn jatqa oqydy. Ekinshi kezeńde onyń óleńderine án shyrqady.
Jezdi kentinen kelgen qatysýshy, onynshy synyp oqýshysy Saǵynysh Barken fınalǵa barynsha daıyndalǵan eken. Ol aqynnyń 44 óleńin jatqa oqydy.
«Aýdandyq týrǵa 16 adam qatysyp, Men birinshi oryn aldym. Baıqaý úshin men Sáken Seıfýllınniń prozasynda 44 óleń, 5 poema jáne 2 shyǵarma daıyndadym. Meniń súıikti óleńim - «Syr sandyq». Ol ońaı jattalady, dostyq týraly syr shertedi», - deıdi Saǵynysh Barken.
Uıymdastyrýshylar atap ótkendeı, «Sáken oqýlary» mánerlep oqý baıqaýynyń basty maqsaty - aqynnyń shyǵarmalaryn nasıhattaý, oqýshylardyń mánerlep oqý daǵdylaryn damytý.
«Men Sákenniń týǵan jerinde onyń mereıtoıy atalyp ótip jatqanyna qýanyshtymyn. Óziniń qysqa ǵumyrynda Sáken ózinen keıingi urpaqqa úlken iz qaldyryp úlgerdi. Bizdiń balalarymyz muny bilýi kerek jáne ony este saqtaýlary tıis. Bul baıqaý jyl saıyn ótkizilse degen tilegimiz bar. Bolashaqta da respýblıkalyq mańyzǵa ıe bolady dep úmittenemiz», - dedi qazylar alqasynyń tóraǵasy, aqyn, fılologııa ǵylymdarynyń doktory Kúlásh Ahmetova.
Baıqaý qorytyndysy boıynsha «Syr sandyqty ashyp qara» nomınatsııasy boıynsha S. Seıfýllın atyndaǵy mekteptiń 7 synyp oqýshysy Jasmın Ábdirahman úzdik atandy (Shet aýdany). Ol aqynnyń 70 óleńin jatqa biledi. «Sákenniń án sandyǵy» nomınatsııasy boıynsha oblystyq mamandandyrylǵan mýzyka mektep-ınternatynyń 11 synyp oqýshysy Arýjan Sapan jeńimpaz atandy.
Jeńimpazdarǵa dıplomdar men baǵaly syılyqtar, al barlyq qatysýshylarǵa sertıfıkattar tabys etildi.
