Qaraǵandy oblysynda 7 myńnan astam túlek mektep bitirdi
QARAǴANDY. QazAqparat - Búgin Qaraǵandy oblysynda 7 543 túlek úshin sońǵy qońyraý soǵyldy. Óńir basshysy Erlan Qoshanov túlekterdi quttyqtaý úshin Shet aýdanynyń Jaryq aýylyndaǵy mektepke baryp qaıtty, dep habarlaıdy QazAqparat.
Qaraǵandy oblysynyń ákimi Erlan Qoshanov túlekterdi quttyqtaý úshin Shet aýdanynyń Jaryq aýylyndaǵy tálim alǵan mektebine keldi. Munda bıyl 34 on birinshi synyp oqýshylary úshin sońǵy qońyraý soǵyldy. Olardyń úsheýi «Altyn belgige» úmitker.
«Búgin men sizderdi ár adamnyń ómirindegi eń mańyzdy oqıǵalardyń birimen quttyqtaý úshin arnaıy keldim. Men Qaraǵandy oblysynyń barlyq túlekterin mektep bitirýimen quttyqtaǵym keledi. Sizderdiń aldaryńyzda barlyq joldar ashyldy. Memleket jastarǵa barlyq múmkindikterdi jasaýda - oqýǵa granttar bar. Dál qazir aldaryńyzda turǵan basty másele - «keleshekte kim bolamyn?» degen suraqqa jaýap izdeý. Meniń oıymsha, sizder durys tańdaý jasap, óz joldaryńyzdy taba alasyzdar», - dedi Erlan Qoshanov.
Óńir basshysy túlekterge ýaqytty baǵalap, alǵa qoıǵan maqsattarǵa esh kúmánsiz qadam basýǵa keńes berdi. Al osy túlekterge tálim-tárbıe bergen muǵalimderge alǵys hat, pedagogıkalyq eńbek ardagerlerine - oblys ákiminiń Qurmet gramotasyn tabys etti.
Syılyqqa sondaı-aq aýyldyq mektep eki ınteraktıvti taqta satyp alýǵa sertıfıkat aldy.
Mektep bitirýshilerdi ardager-ustaz Maǵfýza Sábıtova qarsy aldy. Jarty ǵasyr shamasynda ol osy mekteptiń oqýshylaryna matematıkadan sabaq bergen.
Balalardyń aıtýynsha, olardyń barlyǵy qandaı mamandyqty meńgeretinin tańdap úlgengen. 21 túlek joǵary oqý oryndaryna túsý úshin UBT tapsyrady. Mektep bitirýshilerdiń kóbisi qaraǵandylyq ýnıversıtetterge barǵysy keledi.
«Altyn belgige» úmitkerlerdiń biri Arýjan Ysqaqova Qaraǵandy memlekettik tehnıkalyq ýnıversıtetine «Esep jáne aýdıt» mamandyǵyna qujat tapsyratynyn aıtty.
Bul kúni aýylda Túlekter alleıasy salyndy. On birinshi synyp oqýshylary mektep janynda aǵashtar otyrǵyzdy.
Sońǵy qońyraý merekesi oblystaǵy 512 mektepte ótti, 7 543 túlek mektep qabyrǵasynan úlken ómirge qadam basty. 296 túlek «Altyn belgi», 241 túlek úzdik attestatqa úmitker.
28 mamyrdan 7 maýsymǵa deıin on birinshi synyp oqýshylary orta bilim týraly attestat alýǵa emtıhan tapsyrady.
20 maýsym men 5 shilde aralyǵynda Qazaqstan boıynsha UBT ótedi. Mamyr aıynyń sońynda oblys boıynsha naqty merzimder belgili bolady. Óńirde bes joǵary oqý orny men on jalpy bilim beretin mektepterde testileý pýnkteri uıymdastyrylady. UBT tapsyrýǵa túlekterdiń 70%-y, ıaǵnı 5 268 oqýshy nıet bildirdi. 
