Qaraǵandy oblysynda «7-20-25» baǵdarlamasy aıasynda baspana alýǵa 173 ótinish tústi
QARAǴANDY. QazAqparat - Qaraǵandy oblysy ákimdiginiń málimdeýinshe, aǵymdaǵy jyldyń aqpan aıynyń basynda Qaraǵandy oblysynda «7-20-25» baǵdarlamasy boıynsha jalpy somasy 1,879 mlrd teńgeni quraıtyn 173 ótinish kelip túsken.
Olardyń ishinde 101 ótinishke oń jaýap qaıtarylyp, 91 nesıe berilgen, dep habarlaıdy QazAqparat tilshisi.
Baǵdarlamaǵa qatysýshylar jekemenshik qurylys kompanııalary salyp jatqan qazirgi zamanǵy turǵyn úılerde turatyn bolady. Barlyǵy oblysymyzda bul júıe boıynsha 12,5 myń páter satý josparlanyp otyr.
Oblystyq bıýdjetten «7-20-25» baǵdarlamasy boıynsha turǵyn úı sertıfıkattaryna bir mıllıard teńge bólingen. Olardy respýblıkalyq deńgeıde, tıisti erejeler qabyldanǵan soń bere bastaıdy.
Turǵyn úı sertıfıkaty alǵashqy jarnany bir mıllıon teńgege tómendetýge múmkindik beredi. Ol tek bıýdjettik sala - densaýlyq saqtaý, bilim berý, quqyq qorǵaý organdarynyń qyzmetkerleri úshin ǵana qarastyrylǵan.
Turǵyn úı sertıfıkatyn tek bir ret qana alýǵa bolady. Bir mıllıon teńgeni arnaıy bank shotyna aýdarady. Aqshany shottan sheship alyp, baspana satyp alýdan basqa qajettilikterge jumsaýǵa bolmaıdy.
Arnaıy turǵyn úı komıssııasy baspanaǵa muqtaj otbasylardyń tizimderin quraıdy. Sonan soń qujattar TurǵynÚıQurylysJınaqBankine jiberilip, nesıe alýshynyń tólem qabileti tekseriledi.
Sonan soń tizimder Jumyspen qamtý jáne áleýmettik qorǵaý basqarmasyna jiberiledi, onda turǵyn úı sertıfıkattary boıynsha qarajat bólinedi. Bir mıllıon teńge esepshotqa túsken soń nesıe alýshyǵa sáıkesinshe baspana izdeýge jáne bankpen kelisimshart ortanýǵa úsh aı ýaqyt beriledi.
