Qaraǵandy oblysynda 60 myń teńge para alǵan ınspektor ustaldy
QARAǴANDY. QazAqparat - Qarqaraly aýdanyndaǵy tirkeý-emtıhandyq jumystar tobynyń avtoınspektory 60 myń teńge kóleminde para alý kezinde ustalyp, oǵan memleketke iri kólemdi aıyppul tóleý úkimi shyǵaryldy, dep habarlaıdy «QazAqparat» HAA tilshisi.
«Sottalýshy jeke tulǵalardan onyń qyzmettik ókilettiligine kiretin áreketteri úshin 30 000 teńgeden eki ret para alǵan. Leıtenant qylmystyq is jasaǵany úshin Qylmystyq kodekstiń 366-babynyń 3 tarmaǵynda qarastyrylǵan «birneshe ret para alý» boıynsha aıypty dep tanyldy», - dep habarlaıdy Qarqaraly aýdandyq sotynyń baspasóz qyzmeti.
Sot leıtenanttyń qasaqana jemqorlyq jasaı otyryp, «Sybaılas jemqorlyqqa qarsy is-qımyl týraly» jáne «Qazaqstan Respýblıkasynyń memlekettik qyzmeti týraly» eki birdeı zańdy buzǵandyǵyn atap kórsetti.
Sot onyń isine qatysty alynǵan paradan jetpis ese kóp mólsherde, ıaǵnı múliktik tárkileýmen 2 mıllıon 100 myń teńge kóleminde aıyppul tóleý jazasyn taǵaıyndady.
Oǵan ómir boıy memlekettik qyzmet atqarýǵa tyıym salyndy. Sondaı-aq ol polıtsııa leıtenanty dárejesinen aıyryldy.
