Qaraǵandy oblysynda 6 myńnan astam avtokólik zańdastyryldy
23 qańtar men 30 maýsym aralyǵynda Qaraǵandy oblysynda shamamen 6 500 shetelden ákelingen kólik jáne 1 200 qurastyrýshy-kólik zańdastyryldy. Sonymen qatar shetelden ákelingen kólikterin zańdastyrýǵa 30 maýsymǵa deıin ótinish berip, zańdastyryp úlgermegen kólik ıelerine zańdastyrýǵa múmkindik beriledi.
«Búginde ártúrli sebeptermen, onyń ishinde olarǵa qoıylǵan shekteýlerge baılanysty zańdastyrylmaǵan avtokólikter 200 myń teńge tólemeı 5 jyl merzimge ýaqytsha esepke qoıylady degen sheshim qabyldandy. Kólik ıelerine kólikterin tirkeý týraly kýálik jáne Qazaqstan Respýblıkasynyń memlekettik tirkeý nómiri beriledi. Memlekettik tirkeý nómirine tólenetin baj salyǵy 9 660 teńgeni bolsa, kólik quralyn tirkeý týraly kýáligine 4 313 jáne ádettegi tirkeý úshin 863 teńge alymdy tóleý qajet. Avtokólikti basqa eldegi sońǵy tirkelgen jeri boıynsha esepten shyǵarǵan jaǵdaıda ony zańdastyrý erejelerine sáıkes tirkeýge bolady. Eger Qazaqstan azamattary avtokólikterdi elden tys jerlerge áketý týraly sheshim qabyldasa, onda olar Qazaqstan Respýblıkasynyń kólik quraldaryn tirkeý kýáligin jáne memlekettik tirkeý nómirin tapsyryp, olarǵa tirkeý qujattary men shet memlekettiń memlekettik tirkeý nómiri qaıtarylady», – dedi Qaraǵandy oblysy PD ákimshilik polıtsııa basqarmasynyń bastyǵy Baǵdat Kákimov.
Óńirde avtokólikterdi jarııa etý boıynsha buryn berilgen ótinimderdi tirkeý jumystary jalǵasyp jatyr. Mamandandyrylǵan HQKO angary shtattyq rejımde jumys isteıdi. Sonymen qatar Protsessıng ortalyǵynyń qyzmetkerleri azamattarǵa avtokólikterdi zańdastyrý jáne olardy ýaqytsha esepke alý máseleleri boıynsha keńes berip jatyr.
