Qaraǵandy oblysynda 6 eldiń sportshylary erejesiz jekpe-jekten ótkizilgen týrnırde kúsh synasty
QARAǴANDY. QazAqparat – Qaraǵandy oblysynyń Qarqaraly qalasynda «Kaskad» demalys aımaǵynda «Abadan» erejesiz jekpe –jekten halyqaralyq týrnıri ótti. Saıys Nurken Ábdirovtiń 100 jyldyǵyna arnaldy, dep habarlaıdy QazAqparat tilshisi.
Týrnırdiń uıymdastyrýshysy – «Abadan» kúres klýby. Jarysqa Qazaqstannan, Aýǵanstannan, Ózbekstannan, Tájikstannan, Qyrǵyzstannan jáne Reseıden jınalǵan 20 sportshy qatysty.
«Bul dástúrli týrnır jetinshi ret ótkizildi. Jáne de biz ony alǵash ret Qarqaraly qalasynda ótkizdik. Saıystyń aldyńǵy altaýy Qaraǵandyda ótken bolatyn. Biraq endi jyl saıyn jazda bir týrnırdi dál osy jerde ótkizemiz», - dedi týrnırdiń uıymdastyrýshysy, «Abadan» klýbynyń jetekshisi Nurlan Qaltaev.
Týrnır qorytyndysy boıynsha «Abadan Fighting Championship» dodasynyń bas chempıondyq belbeýlerin Shymkentten Bekjan Ótemisov pen Nur-Sultan qalasynan Álı Qabdolla ıe boldy. Bekjan Ótemisov qaraǵandylyq Oleg Ýdodpen bolǵan kezdesýde jeńiske jetti. Al Álı Qabdolla Ózbekstannan kelgen sportshy Hýsnıddın Mahsýdovty jeńdi.
Budan basqa almatylyq Meıir Ábilǵazıev Tájikstannan kelgen Djonon Safarovty jeńip shyqty. Al Qyrǵyzstannan kelgen Jaqyp Týǵanbaev almatylyq Áshimhan Máýlendi jeńdi. Reseılik Kırıll Shabanov Tájikstannan kelgen Djalollıdın Djýrevten jeńilip qaldy. Qaırat Nurbaı ýýlý Sultan Joldoshbek ýýlýǵa jol berdi. Qaraǵandylyq Jantas Qojanásip Aýǵanstannan kelgen Mırıýbaı Haıdarmen bolǵan kezdesýde jeńiske jetti. Jorabek Teshebaev almatylyq Myrzam Erkenbekovpen bolǵan kezdesýde basym tústi. Maırbek Bersanov qaraǵandylyq Mıras Muhamedjanovtan jeńilip qaldy. Al almatylyq Aıan Aıtýǵanov qaraǵandylyq Baýyrjan Qýanyshbaevqa ese jiberdi.
