Qaraǵandy oblysynda 6 aılyq sábı koronavırýs juqtyrdy
NUR-SULTAN. QazAqparat – Qaraǵandy, Pavlodar, Qyzylorda oblystarynda koronavırýs ınfektsııasyna shaldyǵýdyń jańa oqıǵalary týraly málimet berildi, dep habarlaıdy QazAqparat coronavirus2020.kz saıtynyń Telegram-kanalyna silteme jasap.
17 sáýir, saǵat 10.05-tegi sońǵy málimet boıynsha, Qazaqstanda indetti juqtyrǵandardyń jalpy sany 1470-ke jetti. Onyń ishinde Qaraǵandy oblysynda – 3, Pavlodar oblysynda – 2 jáne Qyzylorda oblysynda 9 oqıǵa jańadan tirkeldi.
Qaraǵandy oblysynda anyqtalǵan 3 naýqastyń biri - 6 aılyq bala. Jaǵdaı Qaraǵandy qalasynda tirkeldi. Іndetti juqtyrǵan onyń ata-anasy ınfektsııalyq gospıtalda jatqan. Bala provızorlyq gospıtalda boldy.
Ekinshi naýqas - 41 jastaǵy Qaraǵandy turǵyny. Infektsııa juqtyrǵandarmen baılanysta bolǵan. Soǵan oraı, provızorlyq gospıtalge ornalastyrylǵan edi.
Úshinshi naýqas - 19 jastaǵy Temirtaý turǵyny. Ol da naýqastarmen jaqyn baılanysta bolǵan.
Qaraǵandy oblysynda osy ýaqytta naýqastardyń jalpy sany 87 adamǵa jetti.
Pavlodar oblysynda tirkelgen eki naýqastyń biri 71 jastaǵy Ekibastuz turǵyny. Ol birden provızorlyq gospıtalǵa jetkizilgen. Er adamnyń sózinshe, ol bes kún boıy aýyrǵan. Biraq medıtsınalyq kómekke júginbegen.
Ekinshi naýqas – 42 jastaǵy Pavlodar qalasynyń turǵyny.
«15 sáýirde ol JRVI dıagnozymen provızorlyq pýlmonologııalyq gospıtalǵa jetkizildi. Áıeldiń aıtýynsha, ol shetelge shyqpaǵan, KVI juqtyrǵandarmen baılanysta bolmaǵan», - delingen aqparatta.
Sońǵy derek boıynsha, Pavlodar oblysynda koronavırýspen barlyǵy 15 adam tirkelgen.
Qyzylorda oblysynda birden 9 jaǵdaı anyqtaldy. Naýqastardyń barlyǵy Jańaqorǵan aýdanynyń turǵyndary.
Aýrý juqtyrǵandardyń úsheýi - 30-53 jas aralyǵyndaǵy áıelder. Altaýy - er adamdar, olardyń arasynda eń úlkeni - 83 jasta.
«8 adam koronavırýs ınfektsııasyn juqtyrǵandarmen baılanysta bolǵan. Al 1 adamnyń indetti qalaı juqtyrǵany boıynsha epıdemıologııalyq zertteý júrgizilýde. Olarmen qarym-qatynasta bolǵan adamdar anyqtalyp jatyr», - delingen málimette.
Qyzylorda oblysynda jańa vırýsqa shaldyqqandardyń jalpy sany 143 adamǵa jetti.
