Qaraǵandy oblysynda 500-ge jýyq mektepte jańa oqý jyly dástúrli formatta bastaldy
Oqýshylardy Bilim kúnimen óńir basshysy Jeńis Qasymbek quttyqtady. Ol oblys ortalyǵyndaǵy Prıshahtınsk shaǵyn aýdanynyń №51 qosymsha bilim berý mektep-ortalyǵynda boldy.
«Búgin oblysta 20 myńnan astam birinshi synyp oqýshysy mektepke bardy. Barlyq oqýshylarǵa sáttilik tileımin. Biz bir jarym jyl karantın jaǵdaıynda ómir súrip, jumys istep kelemiz, barlyǵy mektepti saǵyndy. Bizdiń ustazdarymyzǵa úlken rahmet – qıyn jaǵdaıǵa qaramastan, olar balalarǵa sapaly bilim berýde», – dedi Jeńis Qasymbek.
Oblys ákimi birinshi synyp oqýshylaryna «Álippe» jáne «Býkvar» syndy alǵashqy kitaptaryn tabys etti.
51-shi mektepte baǵdarlamaǵa saı oqytýdan basqa 12 baǵyt boıynsha tegin úıirmeler jumys isteıdi. Dırektor Órikbaı Arınovtyń aıtýynsha, onda kórshi mektepterdiń oqýshylary da aınalysady. Úıirmelerge barlyǵy 500-den astam balalar men jasóspirimder keledi.
Sonymen qatar, mektep ınklıýzıvti bolyp tabylady. Munda erekshe qajettilikteri bar oqýshylar úshin barlyq jaǵdaı jasalǵan. Mektep aýlasynda oblystaǵy alǵashqy sensorlyq baq quryldy.
«Biz tabıǵı materıaldardy – qum, qıyrshyq tastar, konýstar jáne basqalaryn qoldandyq. Sensorlyq baq balalardyń aınalany qabyldaý deńgeıin jáne usaq motorıkasyn damytady. Bul ekoterapııanyń qýatty quraly bolyp tabylady. Sonymen qatar, ashyq túster jaǵymdy emotsııalar týdyrady, balalarda estetıkalyq talǵam damıdy», – dep atap ótti jobanyń bastamashysy, bıologııa muǵalimi Saıda Sheralıeva.
Baqshany qurý úshin memlekettik qarajat jumsalmady. Ideıany muǵalimder, balalar jáne ata-analar birlesip júzege asyrdy.
