Qaraǵandy oblysynda 400-den astam turmysy nashar otbasy tekserildi

QARAǴANDY. QazAqparat – Qaraǵandy oblysynda turmysy tómen otbasylardy tekserýge arnalǵan «Qamqor» keń aýqymdy reıd ótti, dep habarlaıdy QazAqparat.

Tekserý 400-den astam otbasyna júrgizildi. Balalardy qanaý nemese olarǵa qııanat jasaý faktileri anyqtalǵan joq.

Reıdke 885 adam qatysty. Top quramyna kámeletke tolmaǵandardyń isteri jáne olardyń quqyqtaryn qorǵaý jónindegi komıssııalardyń hatshylary men músheleri, ákimdikterdiń, bilim berý, densaýlyq saqtaý, áleýmettik qorǵaý, mádenıet, sport basqarmalary men bólimderiniń, ishki ister jáne tótenshe jaǵdaılar departamentteriniń qyzmetkerleri, jastar jáne qoǵamdyq uıymdardyń, BAQ, ata-analar qoǵamdastyǵynyń ókilderi kirdi.

Reıdterge qatysýshylar saıajaılardy, fermerlik sharýashylyqtardy, turǵyn úılerdiń jertóleleri men shatyrlaryn, bazarlardy, temirjol jáne avtobýs vokzaldaryn, avtojýý keshenderin tekserdi.

Kámeletke tolmaǵandardyń ómir súrý jaǵdaılaryn anyqtaı otyryp, top ókilderi ata-analarmen ishimdik ishýdiń aldyn alýǵa, ata-ana mindetterin tıisti túrde oryndaýǵa jáne órt qaýipsizdigi erejelerin saqtaý qajettiligine baǵyttalǵan áńgimeler ótkizdi.

Reıd qorytyndysy oblys ákimdigi janyndaǵy kámeletke tolmaǵandardyń isteri jónindegi komıssııanyń kezekti otyrysynda qaralady.