Qaraǵandy oblysynda 400-den astam obektide sanıtarlyq rejım saqtalmaǵan

Karantın sharalary jeńildetilgenimen Qaraǵandy oblysynda sanıtarlyq-epıdemıologııalyq rejımniń saqtalýy qatań baqylaýda. Oblystyń barlyq eldi mekenderinde dezınfektsııalaý jumystary josparly túrde júrgizilip keledi. Qoǵamdyq oryndar men qoǵamdyq kólikterdegi aldyn alý, baqylaý sharalary da kúsheıtile tústi. Іri saýda oryndary men mekemelerdiń de sanıtarlyq talaptarǵa jaýapkershilikpen qarap, qaýipsizdikti kúsheıtkeni de anyq baıqalady.

Oblystyń bas sanıtarlyq dárigeriniń qaýlysynda COVID-19 boıynsha shekteý sharalarymen qatar, jumysyna kirisken bıznes ókilderi vırýs juqtyrýdyń aldyn alý úshin «ne istep, ne qoıýy» kerektigi egjeı-tegjeıli jazylǵan. Kópshilik nazaryna usynylǵan bul qujatta kórsetilgen talaptarǵa boı usynsaq, vırýstan túbegeıli qutylmasaq ta, kún ysyǵanda turǵyndardyń indetten aman bolary sózsiz.

Osy maqsatta oblys boıynsha COVID-19 boıynsha shekteý sharalardyń oryndalýyn qadaǵalaıtyn 65 mobıldik top qurylǵan. Quramynda Taýarlar men kórsetiletin qyzmetterdiń sapasy men qaýipsizdigin baqylaý departamentiniń mamandary, polıtsııa qyzmetkerleri, oblystaǵy «Atameken» ulttyq kásipkerlik palatasy men jergilikti atqarýshy organdardyń ókilderi bar bul toptyń negizgi mindeti – bas sanıtarlyq dárigerdiń «Karantın jaıly jáne Qaraǵandy oblysy aýmaǵynda karantın sharalaryn odan ári jeńildetý týraly» qaýlysynda kórsetilgen shekteý sharalarynyń oryndalýyn qadaǵalaý.

Kún-tún demeı, zalalsyzdandyrý sharalarynyń oryndalýy men sanıtarlyq normalardyń saqtalýynyń kúzetinde júrgen top músheleri rejım buzǵandarǵa qatań ákimshilik sanktsııalar qoldanyp ta úlgergen. Odan bólek, atalmysh top ortaq tártipke baǵynbaǵan bıznes ókilderiniń qyzmetin toqtatýǵa da qaýqarly.

Oblysta 100 balabaqshada kezekshi toptar, 12 korrektsııa kabınetteri jumysyn bastaıdy. Odan bólek, 8 maýsymnan qosymsha bilim berý nysandary, balalar men eresekterge arnalǵan damý ortalyqtarynyń jumystary jandandy. Mekemelerde sanıtarlyq talaptar saqtalmaı, zalalsyzdandyrý jumystaryn júrgizbegender bolsa, zań aıasynda jazalanady. Bul úshin «Ákimshilik quqyqbuzýshylyq» týraly kodekstiń arnaıy baby da bar. «Tótenshe jaǵdaı rejımin buzý» dep atalatyn 476-bapta memlekettik organ belgilegen rejımdi buzǵanǵa nemese talaptaryn oryndamaǵanǵa on aılyq eseptik kórsetkish mólsherinde aıyppul salynatyny ne on bes táýlikke deıin ákimshilik qamaýǵa alynatyny jazylǵan.

Jazanyń qatańdyǵyna, aıyppul mólsheriniń aýqymdylyǵyna qaramastan, qatelesip, mobıldik toptyń nazaryna ilikkender de joq emes. Osyndaı nysandar boıynsha polıtsııa organdary sottyń qaraýyna 406 is tapsyrǵan. Onyń 111-i sottyń sheshimimen qyzmetin toqtatsa, 265-i 10 aılyq eseptik kórsetkishi kóleminde aıyppul tóleıdi. Al, 9 nysan eskertý alǵan. Al, qalǵandary sot sheshimin kútýde.

Oblysta koronavırýs ınfektsııasyn juqtyrý jaǵdaıy azaıǵan joq. Osyǵan baılanysty qalaishilik jolaýshy tasymalymen aınalysatyn qoǵamdyq kólikterde de sanıtarlyq rejımniń qatań qadaǵalanýy – basty nazarda. Búgingi kúnge deıin tekseristen ótken 508 avtokóliktiń 505-i zalalsyzdandyrý quraldarymen salon ishin óńdep, jolaýshylar da, júrgizýshiler men kondýktorlar da betperde kıetini anyqtaldy. Qalǵan úsheýine eskertý jasaldy. Eger kemshilik qaıtalanatyn bolsa, olardyń halyqqa qyzmet kórsetýine tyıym salynady.

Álbette, vırýs qolǵa ustalmaıdy, kózge kórinbeıdi. Dertke shaldyǵyp, san soǵyp qalmaý úshin árkimniń saqtyq sharalaryn ustanýy – asa mańyzdy. Bir adamnan bastalyp, dúıim jurtqa taralatyn indetti qatań tártiptiń ǵana jeńe alatynyn ózge elderdiń tájirıbesi dáleldedi. Bas sanıtarlyq dárigerdiń karantın jaǵdaıyndaǵy shekteý sharalaryna qatysty qaýlysynyń qapysyz oryndalýy – quzyrly mekemelerdiń ǵana emes, oblystyń ár turǵynynyń tikeleı mindeti.

Saltanat ІLIıASh