Qaraǵandy oblysynda 4,4 myń gektar sýarmaly jer qalpyna keltiriledi
Aıta keteıik, senator Rysqalı Ábdikerov Úkimet basshysyna joldaǵan depýtattyq saýalynda Qanysh Sátpaev atyndaǵy kanaldyń qýatyn aýyl sharýashylyǵynda tolyq paıdalanýǵa múmkindik jasap, Qaraǵandy oblysynda sýarmaly jemis-kókónis alqabynyń kólemin arttyrýdy jáne oǵan tıisti qarajat bólýdi usynǵan bolatyn.
«Q. Sátbaev atyndaǵy sý arnasynyń jobalyq qýaty búgingi kúni jylyna 1,2 mlrd tekshe metr sýdy quraıdy. Kanaldyń jyldyq sý tutynýy (ónerkásiptik kásiporyndar, aýyl sharýashylyǵy taýaryn óndirýshiler, tabıǵatty qorǵaý, sý arnalary jáne basqa uıymdar) 2022 jyly 477,8 mln tekshe metr boldy. 2023 jyly 492 mln tekshe metr kóleminde sý berý josparlanýda. «Jasyl Qazaqstan» Ulttyq jobasy aıasynda sýarmaly jerlerdi ulǵaıtý maqsatynda Qaraǵandy oblysynda 2023-2024 jyldary 42,9 shaqyrym sýarý kanaldaryn qaıta jańartý josparlanýda. Nátıjesinde 4,4 myń gektar sýarmaly jer qalpyna keltiriletin bolady», - dedi Úkimet basshysy jaýabynda.
Sondaı-aq Premer-Mınıstr «2030 jylǵa deıin sýarmaly jerlerdiń aýdanyn 3 mln gektarǵa deıin jetkizý» baǵdarlamasy aıasynda Qaraǵandy oblysy boıynsha aınalymǵa jańa 100 myń gektar sýarmaly jerlerdi engizý kózdelip otyrǵanyn aıtady.
Bul is-shara aýyl sharýashylyǵy ónimin óndirýdi ulǵaıtýǵa jáne jańa jumys oryndaryn qurýǵa múmkindik beredi. 2023-2024 jyldarǵa arnalǵan osy baǵdarlamany iske asyrý úshin Qaraǵandy oblysynyń ákimdigi sýarmaly jerlerdi 14,9 myń gektarǵa (2023 jyly – 4 myń gektar, 2024 jyly – 10,9 myń gektar) deıin ulǵaıtý josparyn ázirledi», - dedi Álıhan Smaıylov.
Úkimet basshysy Pavlodar oblysynda sýarmaly eginshilikti damytý úshin 16,9 mlrd teńge somasyna jalpy aýdany 20,1 myń gektar sýarmaly ýchaskelerge ınjenerlik-kommýnıkatsııalyq ınfraqurylymdy júrgizý boıynsha ázirlengen jobalaý- smetalyq qujattamasy bar 22 jobamen jumys júrgizilip jatqanyn atap ótedi.
«Joǵaryda atalǵan jobalardy iske asyrý qorytyndysynda sýarý alańyn 2030 jylǵa qaraı 190 myń gektarǵa deıin ulǵaıtý josparlanǵan. Budan basqa, Pavlodar oblysynda aýyl sharýashylyǵynyń sý shyǵynyn azaıtý úshin sýarmaly jerlerdi engizýdiń ulǵaıýyna baılanysty jyl saıyn tamshylatyp sýarylatyn alańdar jáne sýarýdyń dıspersti tásilimen jańbyrlatqysh mashınalardy paıdalaný ulǵaıady. Osylaısha, tamshylaý tehnologııalaryn qoldana otyryp, jyl saıyn aýdandy ulǵaıtý shamamen 200 gektardy quraıdy. Qazirgi ýaqytta tamshylaý tehnologııalary 1000 gektar aýmaqta qoldanylady», - dedi ol.
Foto: sorochinsk.info
