Qaraǵandy oblysynda 376 mektep qashyqtan oqytýǵa kóshedi
QARAǴANDY. QazAqparat - Tórtinshi toqsan bastalysymen oblystyń kóptegen mektepteri qashyqtan oqytý formatyna kóshedi. Mundaı sharalardy aımaq basshylyǵy COVID-19 taralýyna jol bermes úshin qabyldap otyr, dep habarlady QazAqparat tilshisi.
Oqýshylar qalaı oqıtynyn jáne óńirimizdiń osyndaı jańa ádiske qanshalyqty daıyn ekenin bilim basqarmasynyń jetekshisi Esenǵazy Imanǵalıev málimdedi.
«6 sáýirde 208 qalalyq mektep qashyqtan oqytýǵa kóshedi, bul - 155 095 oqýshy. Jáne 168 aýyl mektebindegi 38 519 oqýshy da osy formatqa aýysady. Sabaqtar Google Classroom, Daryn, online.kz, Edupage.org, Moodle jáne Zoom platformalarynda ótedi», - dedi ol.
131 aýyl mektebinde oqytý dástúrli túrde jalǵasady. Bul oblystyń shalǵaı aýdandaryndaǵy mektepter, onda oqýshylar sany 80 adamnan kem. Eki aýysymda oqıdy, kabınettik júıe toqtatylady. Ǵımarattyń ózinde sanıtarlyq tártip kúsheıtiledi.
Qazir óńirde barlyq muǵalimder men oqýshylardy gadjetter men kompıýterlermen, sondaı-aq ınternetke úzdiksiz qoljetimdilikpen qamtamasyz etýge tyrysady. Jergilikti atqarýshy organdar kompıýterler men planshetterdi satyp alýǵa qarajat bólý boıynsha jumys júrgizýde. Oblystyń segiz aımaǵynda 2 409 kompıýter men planshet satyp alýǵa 377 mln teńge bólindi.
Muǵalimderdiń 92,5 % qashyqtan sabaq júrgizý múmkindigine ıe.
Oqýshylardyń 95,1% kompıýtermen jáne gadjettermen qamtamasyz etilgen.
Sondaı-aq uıaly baılanys operatorlarymen qashyqtan oqytý kezeńinde jelige qosylý problemalary bar oqýshylarǵa tegin mobıldi ınternet qyzmetin usyný týraly jumys bastaldy.
Aımaqtyń barlyq ınternet-provaıderimen nól jáne mınýs balansta da paıdalanýshylardy qyzmetten ajyratpaıdy degen ýaǵdalastyq bar. Tsıfrlandyrý basqarmasynyń basshysy Rýstam Baıjanov jelige túsetin júktemege qaramastan, qashyqtan oqytýǵa kóshýge baılanysty olar irkilissiz jumys isteıdi dep atap ótti.
