Qaraǵandy oblysynda 36 otbasy baspanaly boldy
QARAǴANDY. QazAqparat - Astananyń mereıtoıy Abaı qalasynda turatyn 36 otbasy úshin erekshe boldy. Osy kúni olar ózderiniń jeke baspanasyna qol jetkizdi. Jańa páterlerdiń kiltin qonystanýshylarǵa oblys ákimi Erlan Qoshanov tabys etti, dep habarlaıdy QazAqparat oblys ákiminiń baspasóz qyzmetine silteme jasap.
- Birinshi kezekte, barlyqtaryńyzdy elordamyzdyń 20 jyldyǵymen quttyqtaǵym keledi. Bul tek astanalyqtar ǵana emes, búkil qazaqstandyqtardyń merekesi, - dedi aımaq basshysy. - Ár otbasy úshin eń bastysy - óziniń jeke baspanasy bolǵany, ol naǵyz baqyt. Búgingi tańda biz Abaıdyń jáne jalpy aýdannyń turǵyndary úshin kóptegen jumystardy jasap jatyrmyz. Qalanyń qalaı gúldenip kele jatqanyn baıqaǵan shyǵarsyzdar. Birinshi kezekte biz turǵyndardyń jaǵdaıyn jaqsartý úshin áleýmettik nysandardy salýdamyz. Jýyrda ǵana júzý basseınin iske qostyq, qazirgi tańda belsendi túrde dene shynyqtyrý-saýyqtyrý kesheni salynyp jatyr, 100 orynǵa shaqtalǵan jataqhana salynady dep josparlanýda. Sondaı-aq biz turǵyn úı salýdy jalǵastyra beremiz. «Nurly jer» baǵdarlamasynyń arqasynda bıyl eki úıdiń qurylysy aıaqtaldy, jáne de alǵash ret turǵyndar óz baspanasyna ıe boldy. Al búgin 36 qonystanýshyǵa kiltterin tabys etip otyrmyz. Sizderdi shyn júrekten quttyqtaımyn, jańa úılerińiz baqytqa tolsyn.
Merdigerlerdiń aıtýynsha, eki kópqabatty turǵyn úıdiń qurylysyna bir jyl ýaqyt ketken eken.
- Biz 2017 jyly tamyzdyń sońynda jumystarymyzdy bastadyq. Bir jylǵa jeter-jetpes ýaqytta 72 páteri bar eki úıdiń qurylysyn aıaqtadyq. Birinshi úıge adamdar qonystandy, turǵyndar óz baspanalaryn mamyr aıynda aldy. Búgin biz ekinshi úıdi qoldanysqa berip, jańa qojaıyndarǵa páter kiltterin tabys etip jatyrmyz. Barlyq jumystar 100 paıyz oryndaldy. Qurylys barysyn biz jáne Abaı aýdany ákimdigi baqylap otyrdyq. Barlyq materıaldar - otandyq ónim. «Nurly jer» baǵdarlamasy boıynsha shamamen 600 mln teńge jumsaldy. Úılerde bir, eki jáne úsh bólmeli páterler bar. Jaqyn bolashaqta mańyndaǵy aýmaqty abattandyramyz, oryndyqtar men qoqys jáshikteri ornatylady, - dedi «KKK LTD» JShS kommertsııalyq dırektory Ivan Malıýshenko.
36 páterli 9 qabatty turǵyn úıdiń jalpy aýdany - 2000 m2, páterlerdiń aýdany - 1904 m2.
- Meniń ІІ top múgedektigi bar qyzym páter aldy, óte qýanyshtymyn. Biz kezekte 9 jyl turdyq. Endi mine, baspanaǵa qolymyz jetip, oblys ákiminiń qolynan páter kiltin alyp otyrmyz. Barlyqtaryna, birinshi kezekte elimizdiń PRezıdentine, oblys ákimine jáne Abaı aýdany ákimdigine bizdi qoldaǵany úshin, kómekteskeni úshin alǵysymdy aıtamyn,- deıdi Raısa Muqanova.
Abaı aýdany TKSh bólimi mamandarynyń aıtýynsha, baspana «Nurly jer» baǵdarlamasynyń tórt baǵyty boıynsha berildi.
- Ol áleýmettik qamsyzdandyrylmaǵan turǵyndarǵa jekeshelendirý quqyǵysyz jalǵa baspana berý. Páter ıeleri aı saıyn kommýnaldyq tólemdermen qosa, jalǵa alý aqysyn tólep otyrady, mysaly, bir bólmeli páter úshin 6000 myń teńge. Bizde páterge kezekte 1870 adam tur. Sońǵy ret kezekte turǵandar baspanany 2013-shi jyly múlikti túgendeý barysynda alǵan bolatyn. 2019-shy jyly 80 páterli 5 qabatty turǵyn úı salý jsoparlanyp otyr, - dep málimdedi Abaı aýdany ákimdiginiń TKSh bóliminiń mamany Dına Gýsamova.
Jańa úıden páterler jetim balalarǵa, kópbalaly otbasylarǵa, jalǵyz basty analarǵa, múmkindigi shekteýli azamattarǵa da berildi.
- Jalǵyz ózim úsh balany asyrap otyrmyn. Úlken ulym 21 jasta, ortańǵy balam 17-de jáne kenjem 2 jasta. Bizde búgin baqytty kún, biz 9 jyl boıy kútken baspanany alyp otyrmyz. Osyǵan deıin bizde turaqty baspana bolǵan joq, árdaıym ne jalǵa alatynbyz, ne bolmasa ata-anamnyń qolynda turyp keldik. Al endi ózimizdiń úıimiz paıda boldy, biz qatty qýanyp otyrmyz, osy sátke jettik-aý. Endi ár balamnyń óz bólmesi bolady. Bizdiń páterimiz óte keń jáne jaryq, - deıdi Natalıa Stolbova. 
