Qaraǵandy oblysynda 36 aýyldaǵy 121 strategııalyq nysan ınternetke qosyldy

NUR-SULTAN. QazAqparat - Qaraǵandy oblysyndaǵy 36 aýyldaǵy 121 strategııalyq nysan ınternetke qosyldy. Bul málimetterdi búgin óziniń Facebook-tegi paraqshasynda QR Tsıfrlyq damý, ınnovatsııalar jáne aeroǵarysh ónerkásibi mınıstriniń mindetin atqarýshy Baǵdat Mýsın keltirdi, dep habarlaıdy QazAqparat.

«Búgin Pıonerskoe aýylynda boldyq. Osy aýylda kórshi ornalasqan Tsentralnoe aýylyn da joǵary jyldamdyqtaǵy Internetpen qamtýǵa múmkindik beretin bazalyq stantsııa ornatyldy. Qaraǵandy oblysynda sońǵy eki jyldyń ishinde 876 km talshyqty optıkalyq baılanys jelileri (TOBJ) tóseldi! Óńirdegi 36 aýylda ornalasqan aýrýhana, mektep, ákimshilik ǵımaraty sekildi 121 strategııalyq nysan Internetke qosyldy. Endi TOBJ negizinde uıaly baılanys operatorlary óz jelilerin damytyp, el halqynyń 99% -dan astamyn keńjolaqty Internetpen qamtamasyz ete alady. Muny eldegi tsıfrlyq teńsizdikti joıýdaǵy serpilis deýge bolady»,-dep jazdy B.Mýsın.

Onyń sózinshe, endi atalǵan aýyl turǵyndary memlekettik qyzmetterdi onlaın alatyn bolsa, aýrýhanalar telemedıtsınany jáne t.b. paıdalaný múmkindigine ıe bolady.

«Sondaı-aq, «Terrıkon alqaby» IT-hub jobasyn ázirleýshilermen kezdestim. Bul Qazaqstannyń úzdik ázirleýshileri men IT-salasynyń mamandaryn biriktirgen biregeı joba. Qaraǵandylyqtar búkil respýblıka turǵyndary qoldanyp júrgen WOOPPAY, Flip.kz nemese Hoster.kz. sekildi sátti ІT jobalarymen maqtana alady. Sol aýyldyń turǵynymen kezdesip, onyń beıneqońyraý arqyly Qaraǵandydaǵy oblystyq aýrýhana dárigerinen keńes alǵanyn kórdim. Tapsyrǵan analızderiniń nátıjesin bilý úshin oǵan eshqaıda barýdyń qajeti joq»,-dedi mınıstrdiń mindetin atqarýshy.

«Bul óte mańyzdy, endi Pıonerskoe jáne Tsentralnyı aýyldarynyń turǵyndary oblys ortalyǵyna barmaı-aq, dáriger keńesin úılerinde otyryp ala alady. Bul telemedıtsınanyń múmkindigi men jalpy tsıfrlandyrý sharalarynyń ıgiligi».