Qaraǵandy oblysynda 350 gektarǵa jýyq dala órtenip jatyr

QARAǴANDY. QazAqparat – Búgin Qaraǵandy oblysynda 17 tabıǵı órt tirkeldi. Onyń ishinde 10 ýchaskedegi jalyn ázirge tolyq sóndirilgen joq. Bul týraly QR Tótenshe jaǵdaılar mınıstrliginiń baspasóz qyzmetinen málim etti, dep habarlaıdy QazAqparat tilshisi.

«6 qyrkúıekte Qaraǵandy oblysynyń aýmaǵynda 17 tabıǵı órt tirkeldi. Jalynnyń órshýine joǵary aýa temperatýrasy men jyldamdyǵy 20 m/s jel sebep. Onyń ishinde 7 órt sóndirildi. Al 10 órt oshaǵy baqylaýda. Atap aıtqanda, qazir Shet aýdanyna qarasty Qyzyltaý eldi mekeninde 300 gektar jáne ózge aýmaqtardaǵy aýmaǵy 50 gektardan aspaıtyn 9 dala órti sóndirilip jatyr.

Quzyrly organ dereginshe, órtterdi sóndirýge 279 adam men 78 tehnıka jumyldyrylǵan.

Eske salaıyq, búgin qutqarýshylar Qaraǵandy mańyndaǵy Saran tasjoly boıynda qurǵaq shópten tutanǵan órtti sóndirgenin habarlaǵan bolatynbyz.