Qaraǵandy oblysynda 32 medıtsına qyzmetkeri baspanaly boldy
QARAǴANDY. QazAqparat - Búgin Erlan Qoshanov Qaraǵandy oblysy Shahtınsk qalasynyń 32 jas dárigerine páter kiltterin tabys etti, dep habarlaıdy QazAqparat tilshisi.
Shahtınsk qalasynda jas dárigerler kásibı mereke qarsańynda qonys toıyn toılady. Qaraǵandy oblysy ákiminiń mindetin atqarýshy Erlan Qoshanov 32 qyzmettik páterdiń kiltin tabys etti. Baspana Qaraǵandy medıtsına ýnıversıtetiniń 2018-2019 jylǵy túlekterine berildi. Sondaı-aq jas mamandardy Shahtınsk qalasynyń aýrýhanalary men emhanalaryna jumysqa shaqyrdy.
«Shahtınsk qalasyndaǵy basty máselelerdiń biri - medıtsınalyq kadrlardyń tapshylyǵy. Munda 40-qa jýyq maman jetispeıdi. Endi munda jas dárigerler komandasy keldi. Sizderge jańa jumys qana emes, jańa baspana da usynylady. Ómirlerińizdegi jańa kezeńge qadam basýlaryńyzben quttyqtaımyn. Shahtınsk sizder úshin jańa úı bolady dep oılaımyn, al qalanyń turǵyndary sizderdiń jumysyńyzǵa rıza bolady dep úmittenemiz», - dedi Erlan Qoshanov.
Ótken jyly Shahtınskidegi qaraýsyz qalǵan kópqabatty úıdiń eki kireberisi Qaraǵandy oblysy Densaýlyq saqtaý basqarmasynyń menshigine berilgen bolatyn. Sol kezden bastap onda kúrdeli jóndeý bastaldy. Terezeler, esikter, edender, káriz jáne jylý júıeleri men elektr symdary tolyǵymen aýystyryldy. Páterler jıhazben jáne turmystyq tehnıkamen jabdyqtaldy. Ár úıde teledıdar, mıkrotolqyndy pesh, tońazytqysh jáne kir jýǵysh mashına bar.
Qyzmettik turǵyn úıdiń kiltteri terapevter, jalpy tájirıbe dárigerleri, pedıatrlar, akýsher-gınekologtar, anestezıolog-reanımatologtar, hırýrgtarǵa tabys etildi. Oblystyq densaýlyq saqtaý basqarmasy jańadan kelgen jas dárigerler úshin vedomstvolyq turǵyn úımen qamtamasyz etý osy óńirdegi maman tapshylyǵyn aıtarlyqtaı azaıtýǵa septigin tıgizetinine senim bildiretinin jetkizdi.
«Bizdiń dárigerler óz zattaryn alyp, jańa páterlerge kirip, tura alady. Qajetti turmystyq tehnıka men jıhaz satyp alýdyń keregi joq. Barlyǵy daıyn. Bul bizdiń jobamyzdy dárigerler úshin básekege qabiletti jáne tartymdy etedi», - dep atap ótti densaýlyq saqtaý basqarmasynyń basshysy Erjan Nurlybaev.
Medıtsına qyzmetkerleriniń áleýmettik máselelerin jáne densaýlyq saqtaý salasyndaǵy kadrlyq tapshylyq máselelerin sheshý maqsatynda 2018 jyly jergilikti bıýdjet esebinen aımaq basshysynyń tapsyrmasy boıynsha Qaraǵandy oblysynda 60-qa jýyq páter jóndelip, jas mamandarǵa berildi.
2019 jyly medıtsına qyzmetkerlerin áleýmettik qoldaý jobasyna Shahtınsk, Abaı, Saran, Jezqazǵan jáne Qaraǵandy ákimdikteri tarapynan qoldaý kórsetildi. Eń kóp páter Shahtınsk qalasyndaǵy jas dárigerler úshin daıyndaldy, onda emhana men statsıonar qyzmetkerlerine arnalǵan 32 páter (2 kireberis) jóndeldi.
Sonymen qatar, Qaraǵandyda oblystyq juqpaly aýrýlar aýrýhanasy jas dárigerlerine 7 qyzmettik páter bólý josparlanyp otyr.
Oblys ortalyǵynda jańa oblystyq balalar aýrýhanasyn paıdalanýǵa bergennen keıin bosaǵan eski ǵımaratta densaýlyq saqtaý salasynyń jas mamandary úshin jalǵa beriletin baspana uıymdastyrý kózdelip otyr. Barlyǵy 104 páterdi bólý josparlanýda: 58 - bir bólmeli jáne 46 - eki bólmeli.
Oblys ákimdigi 2018 jyly densaýlyq saqtaý salasyna 333 mamandy tartty. Onyń ishinde 130-y Qaraǵandy qalasynda jumys isteıdi. Aǵymdaǵy jyldyń basynda óńirde dáriger tapshylyǵy 97 mamandy qurady. Oblys rezıdentýrasynda densaýlyq saqtaý mamandaryn daıyndaý úshin jergilikti bıýdjetten 93,7 mln teńge bólindi. Bul qarajatqa 50-den astam dáriger oqýdan ótedi.
