Qaraǵandy oblysynda 30 myńǵa jýyq bala tegin sport sektsııalarymen qamtylady

QARAǴANDY. QazAqparat – Qaraǵandy oblysynda 30 myńǵa jýyq bala óńirdegi 35 balalar-jasóspirimder sport mektebi janyndaǵy tegin sport sektsııalarynda aınalysatyn bolady. Sondaı-aq, óńirde 21 sporttyq nysan salý josparlanyp otyr, dep habarlaıdy QazAqparat tilshisi.

Dene shynyqtyrý jáne sport basqarmasynda oblystyń qalalary men aýdandarynyń barlyq vedomstvolyq baǵynysty sport mektepteri basshylarynyń qatysýymen keńes ótti. Vedomstvoda atap ótkendeı, óskeleń urpaqtyń salaýatty ómir saltyna degen qyzyǵýshylyǵy jyl saıyn artyp keledi. Sondyqtan sport salasynda ózekti máseleler jınaqtalyp qalǵan. Búgin olar dóńgelek ústel basynda talqylandy.

Búgingi tańda óńirde balalardy sportqa tartý boıynsha úlken jumystar júrgizilýde. Botaqara, Ǵ.Mustafın atyndaǵy, Topar, Egindibulaq kentterinde jáne Prıozersk qalasynda dene shynyqtyrý-saýyqtyrý keshenderiniń qurylysy bastaldy, sondaı-aq Balqashta sport kesheni, Nura aýdanynyń Shahterskıı aýylynda jabyq hokkeı korty salynýda.

«Aqtoǵaı aýylyndaǵy stadıondy qaıta qurý bastaldy, Osakarov aýdany Molodejnyı kentindegi balalar-jasósprimder sport mektebinde kúrdeli jóndeý jumystary júrgizilýde jáne Temirtaý qalasynyń BJSM, Qaraǵandydaǵy ústel tennısi jáne gımnastıka boıynsha mektepterde aǵymdaǵy jóndeý jumystary jalǵasýda. Sondaı-aq, bıyl óńirde jańa sport alańdary men kópfýnktsıonaldy hokkeı korttary ornatylady. Barlyǵy 21 ǵımarat ornatylmaq», - dep habarlady Qaraǵandy oblysynyń dene shynyqtyrý jáne sport basqarmasy.