Qaraǵandy oblysynda 3 myńnan astam áleýmettik qorǵalatyn otbasy páter alady
QARAǴANDY. QazAqparat - Qaraǵandy oblysynda aýqymdy qurylys jumystary jalǵasady. Bıyl kezekte turǵan 3 myńnan astam adamdy áleýmettik turǵyn úımen qamtamasyz etý josparda bar, dep habarlaıdy QazAqparat ákimdiń saıtyna silteme jasap.
Bul týraly óńir basshysy Jeńis Qasymbek onlaın formatta ótken halyqpen eseptik kezdesýinde málimdedi.
«Halyqty tolǵandyratyn basty máselelerdiń biri – turǵyn úı jáne ınfraqurylym. Oblysta 36 myńnan astam azamat áleýmettik turǵyn úı kezeginde tur. Bizdiń mindetimiz – barynsha kóbirek qurylys júrgizý. Ótken jyly óńir boıynsha aýqymdy qurylys jumystary ótti. Rekordtyq 530 myń sharshy metr turǵyn úı paıdalanýǵa berildi, bul 2019 jylmen salystyrǵanda 26%-ǵa artyq. 6 500-ge jýyq otbasy turǵyn úı jaǵdaıyn jaqsartty», - dedi oblys ákimi.
Áleýmettik qorǵalatyn sanattaǵy 2 500 kezekte turǵandar páter aldy.
Ákimniń aıtýnysha, áleýmettik jalǵa beriletin jáne nesıelik turǵyn úı berý qarqyny bir jylda 40%-ǵa ósken.
Ol 2021 jyly 20% ósimmen 660 myń sharshy metrden astam turǵyn úı salý josparlanǵanyn habarlady. Bul 3 myńnan astam januıaǵa, onyń ishinde 600-ge jýyq kóp balaly otbasyǵa jalǵa beriletin jáne nesıelik páterlerdi tabys etýge múmkindik beredi.
