Qaraǵandy oblysynda 23 medıtsına qyzmetkeri jalǵan qujatpen jumys istegen
QARAǴANDY. QAZAQPARAT - Qaraǵandy oblysynda 23 medıtsına qyzmetkeri jalǵan kýálikpen qyzmet istegen, dep habarlaıdy QazAqparat.
«Tek Temirtaý qalasynyń ózinde jalǵan qujatpen 21 medıtsına qyzmetkeri eńbek etken. Sonymen qatar mundaı oqıǵalar Balqash jáne Jezqazǵan qalalarynda da tirkelgen. 23 oqıǵanyń 21-i Temirtaý qalasynyń №1 emhanasynda anyqtaldy», - dep málim etti Qaraǵandy oblysynyń Qoǵamdyq densaýlyq saqtaý departamenti basshysynyń medıtsınalyq máseleler boıynsha orynbasary Olga Smırnova.
Onyń aıtýynsha, jalǵan qujatpen jumys jasaǵan qyzmetkerleri departament qyzmetkerleri júrgizgen tekserý barysynda anyqtaǵan. Olar - meıirbıkeler men feldsherler, ıaǵnı ortasha medıtsına qyzmetkerler.
Belgili bolǵandaı, zańbuzýshylyqtar 2016-2017 jyldar jasalǵan. Degenmen, medıtsına qyzmetkerleriniń zańbuzýshylyǵyna qatysty shaǵym jasalmaǵan. Olar qyzmettik mindetterin ruqsatsyz atqaryp kelgen. Aıta keterligi mamannyń sertıfıkaty - qoldanystaǵy zańnamaǵa sáıkes medıtsına qyzmetkeriniń klınıkalyq jumyspen aınalysýyna ruqsat beretin qujat bolyp tabylady.
Qaraǵandy oblysy Densaýlyq saqtaý basqarmasynyń qyzmetkerlerdi basqarý qyzmetiniń basshysy Meıramgúl Maılybaevanyń aıtýynsha, 2013-2018 jyldar aralyǵynda berilgen kýálikterdiń túpnusqalyǵyn anyqtaý úshin birneshe márte arnaıy hattar jiberilgen.
«Odan bólek Densaýlyq saqtaý basqarmasy qosarlama tekserý týraly buıryq shyǵardy, ıaǵnı, aldymen, bizdiń medıtsınalyq uıymdar ózderinde tekserip, keıin ózge de mekemeler tekseris júrgizedi. Bizde tekserý sharalary júrgiziletin arnaıy keste bar», - dedi M.Maılybaeva.
Oblystyń qoǵamdyq densaýlyqty saqtaý departamenti maman kýáligi joq bola tura klınıkalyq tájirıbege jiberilgen tulǵalarǵa qatysty ákimshilik jaýapkershilikke tartý sharalaryn qabyldady. Olarǵa qatysty ákimshilik óndiris isi qozǵaldy. Alaıda 11 jaǵdaıda medıtsınalyq qyzmetker istiń merziminiń ótip ketýine baılanysty, jaýapkershilikten qutyldy.
«Tekseris júrgizilgennen keıin barlyq jumysshylar sertıfıkat alǵanǵa deıin qyzmetterinen bosatyldy. Búginde qyzmetterine qaıta kirisip, bilimderin baǵalaýdan ótti», - deıdi Olga Smırnova.
Onyń aıtýy boıynsha, kýálik medıtsınalyq qyzmetkerge tájirıbelik ispen aınalysýǵa quqyq beredi jáne ony bes jyl saıyn rastap otyrý qajet.
«Biz barlyq málimetter qoryn tekserdik, endi ózge kadrlarǵa qatysty mundaı kemshilik anyqtalmaıdy degen senimdemiz. Osy ýaqyt ishinde medıtsınalyq qyzmetkerler tarapynan eshqandaı quqyqbuzýshylyqtar oryn almady, olardyń barlyǵy - tájirıbeli bilikti mamandar. Jumys ótilderi - 2 jyldan 15 jylǵa deıin. Naqty sebepteri sál keıinirek anyqtalatyn bolady. Temirtaýdaǵy eki qyzmetker óz ótinishteri boıynsha jumystan ketti, ekeýi - dekrettik demalysta, qalǵan jumysshylar testileýden qaıta ótti. Kadrlyq qyzmette jáne meniń tarapymnan qajetti qadaǵalaýdy qamtamasyz etýde kemshilikter kezdesedi. Qatelikterdi túzeýge barynsha tyrysamyz", - dep bólisti Temirtaý qalasy №1 emhanasynyń dırektory Gúlnár Seıit.
Jasandy kýálikter boıynsha medıtsınalyq qyzmetkerlerge qatysty barlyq materıaldar protsesýaldyq sheshim qabyldaý úshin aımaqtyq ishki ister basqarmasyna jiberildi.
