Qaraǵandy oblysynda 22 myń bala birinshi synypqa barady
QARAǴANDY. QazAqparat - Qaraǵandy oblysynda jańa oqý jylyna daıyndyq júrip jatyr. Aldyn ala esepteý boıynsha, 2018-2019 oqý jylynda oqýshylar kontıngenti ósedi. 22 593 bala mektep tabaldyryǵyn attaıdy, dep habarlaıdy QazAqparat tilshisi oblystyq bilim basqarmasynyń baspasóz qyzmetine silteme jasap.
Jyl saıyn Qaraǵandy oblysynda bilim berý salasyn qarjylandyrý kólemi artyp keledi. Osy jyly 207 bilim berý uıymyn jóndeýge 6 mlrd teńgeden astam qarjy bólindi, bul ótken jylǵydan 1,5 mlrd teńgege artyq. Qazirgi ýaqytta 134 mektep, 50 balabaqsha, 6 qosymsha bilim berý mekemesi, 10 kolledj, 5 ınternat jáne 2 balalar úıinde jóndeý jumystary júrgizilýde.
Kúrdeli jóndeý 34 bilim berý mekemesinde 2,4 mlrd teńge somasyna júzege asyrylady. Oblystaǵy 33 bilim berý nysanynda jóndeý jumystary aıaqtaldy.
Vedomstvonyń málimeti boıynsha qalalar men aýdandardyń bıýdjetterinen oqýlyqtar men oqý-ádistemelik keshenderin satyp alýǵa 2,6 mlrd teńge nemese qajettiliktiń 100% bólingen.
Mektep formasyn kııý QR BǴM-nyń 2016 jyldyń 14 qańtaryndaǵy №26 buıryǵyna sáıkes, mekteptiń jarǵysy men ishki tártipke baılanysty belgilenedi. Mektep formasy klassıkalyq úlgide biryńǵaı túste bolady. Onyń dızaıny ata-analar komıtetimen maquldastyrylady.
