Qaraǵandy oblysynda 2022 jyly volfram óndirile bastaıdy
ASTANA. QazAqparat - Qaraǵandy oblysynda 2022 jyly volfram óndirile bastaýy múmkin, dep jazady ekaraganda.kz portaly.
Portaldyń jazýynsha, geologtar Qaraǵandy oblysynyń Soltústik Qatpar kenishinde úlken volfram qorynyń bar ekendigin rastady. Sırek kezdesetin metaldy óndirý jumystary 2022 jyly bastalýy múmkin.
«Aldyn ala júrgizilgen burǵylaý jumystary Qaraǵandy oblysynyń Soltústik Qatpar kenishinde volfram men molıbdenniń bar ekendigin rastady. Munda volframnyń qory shamamen 90 myń tonnany quraıdy, al molıbdenniń qory 13 myń tonnaǵa jetedi»,-dep habarlady «Taý-Ken Samuryq» UGK» AQ baspasóz qyzmeti.
Zertteý jumystary kenniń tarıhı taralý aımaǵynyń qazirgi málimettermen kóp sáıkesetindigin kórsetti.
Zertteý jumystary otandyq jáne sheteldik mamandardyń qatysýymen júrgizildi. Atalǵan kenish úshin kendi baıytý tehnologııasyn Beıjiń taý-ken isi jáne metalýrgııa ınstıtýty daıyndady.
Qazaqstan volfram óndirý isin jańǵyrtpaq. Elde búginde 10-nan astam volfram kenishteri barlandy. Olardyń arasyndaǵy eń iri ári bolashaǵy zor degenderi Qaraǵandy oblysynyń Shet aýdanyndaǵy Joǵarǵy Qaıraqty jáne Soltústik Qatpar kenishteri sanalady. Aldyn ala málimetter boıynsha, ondaǵy qordyń mólsheri shamamen 1 mlnn-nan astam tonnany quraıdy.
Joǵarǵy Qaıraqty kenishinde geologııalyq zertteý jumystaryn 2019 jyly aıaqtaý kózdelip otyr. Osy zertteýdiń nátıjesi boıynsha, metall qorynyń mólsheri belgili bolady.
