Qaraǵandy oblysynda 2021 jylǵa deıin 32 kópqabatty turǵyn úı salynady
QARAǴANDY. QazAqprat - Qaraǵandy óńiriniń bılik ókilderi oblys ortalyǵyndaǵy oram aralyq joldardy jóndep, jyljymaly medıtsınalyq baqylaý beketterin qurýdy, mektepter men aýrýhanalardy qazirgi zamanǵy jabdyqtarmen qamtamasyz etýdi josparlap otyr, dep habarlaıdy QarAqparat tilshisi.
Qaraǵandy oblysynyń ákimi Erlan Qoshanov úkimettiń keńeıtilgen otyrysynda Prezıdenttiń bergen tapsyrmalary jaıly málimdedi.
Óńir basshysynyń aıtýynsha, tapsyrmalar bilim, densaýlyq, TKSh, sonymen qatar óńirdiń ekonomıkalyq damý salalaryna qatysty boldy.
Qala ákimi Nurlan Áýbákirovke aımaq basshysy Erlan Qoshanov Qaraǵandydaǵy oram aralyq jáne aýlalardyń arasyndaǵy joldardy jóndeýdi tapsyrdy.
Buǵan qosa, oblysta Nazarbaev zııatkerlik mektepteriniń standarttary boıynsha kóptegen mektepterdi jabdyqtaý kerektigi aıtyldy. Bul tapsyrma bilim basqarmasynyń jetekshisi Esenǵazy Imanǵalıevke berildi. Sonymen qatar shalǵaıdaǵy aýdandardyń oqýshylaryn mektep avtobýsymen qamtamasyz etý kerektigi tilge tıek etildi.
Oblys aýdandarynda jyljymaly medıtsınalyq baqylaý beketteri paıda bolýy tıis. Aýrýhanalar men emhanalarda qazirgi zamanǵy jabdyqtar ornatý qajet. Bul mindettemeni Erlan Qoshanov densaýlyq saqtaý basqarmasynyń jetekshisi Erjan Nurlybaevqa artty.
Bılik tarapynan erekshe nazar qaraǵandylyqtardyń turmys sapasyn jaqsartýǵa aýdarylmaq.
«Prezıdent atap ótkendeı, memlekettiń tıimdiligi, birinshi kezekte, halyqtyń tabystary men turmystyq jaǵdaıymen tikeleı baılanysty jáne osy kórsetkishter boıynsha bizdiń de jumysymyz baǵalanady», - dedi ol.
Erlan Qoshanov sonymen qatar Memleket basshysynyń Joldaýy aıasynda 32 myń jumys berýshi 220 myńnan asa jumyskerlerdiń jalaqysyn kótergenin atap ótti. Al kommýnaldyq qyzmet tarıfteri 5-11 % tómendegen. Oblys ákimi azyq-túlik taýarlary men kommýnaldyq qyzmet baǵalaryn turaqtandyrý boıynsha jumystardy jalǵastyrýdy tapsyrdy.
Sonymen qatar basym baǵyttar qatarynda azyq-túlik ónimderiniń ımport almastyrýy men aımaqtaǵy ınvestıtsııalyq jaǵdaıdy jaqsartý bolyp qala beredi. 2019 jyly óńirge 500 mıllıard teńgeden astam ınvestııa jumyldyrylýy tıis.
Bıylǵy jyly «7-20-25» baǵdarlamasyn oryndaý sheńberinde oblystyq bıýdjetten turǵyn úı sertıfıkattaryn qarjylandyrýǵa bir mıllıard teńge bólingen. 2019- 2021 jyldary 32 kópqabatty turǵyn úıler salynady dep josparlanýda. Oblystaǵy stýdentter úshin jalpy eseptegende 1500 orynǵa shaqtalǵan jataqhanalar salynady. Bul maqsatta jer telimderi bólinip, jobalyq smetalyq qujattar ázirlengen.
Erlan Qoshanov qol astyndaǵy qyzmetkerlerge atalmysh josparlardyń oryndalýyn qadaǵalaýdy tapsyrdy.
