Qaraǵandy oblysynda 202 marshrýt boıynsha avtobýs qatynap júr

QARAǴANDY. QazAqparat – Búgin Qaraǵandyda koronavırýs ınfektsııasyna qatysty epıdemıologııalyq jaǵdaı boıynsha brıfıng ótti. Jýrnalısterdiń suraqtaryna Qaraǵandy oblysynyń jolaýshylar kóligi jáne avtomobıl joldary basqarmasy bastyǵynyń orynbasary Nurlan Esentaev jaýap berdi, dep habarlaıdy QazAqparat tilshisi.

Oblys aýmaǵynda koronovırýs ınfektsııasynyń odan ári taralýyna jol bermeý maqsatynda birqatar shekteý sharalary qabyldandy.

Birinshi kezeńde sáýir aıynan bastap barlyq kólik túrimen jolaýshy tasymaldaý toqtatyldy. Karantın kezeńinde aımaqtyń tynys-tirshiligin qamtamasyz etetin uıym qyzmetkerleriniń jekelegen sanattaryn tasymaldaý úshin arnaıy avtobýs reısteri jumys istedi.

«5 mamyrdan bastap karantın rejıminiń bosańsýyna baılanysty biz sanıtarlyq sharalardy saqtaı otyryp, qoǵamdyq kólik jumysyn kezeń-kezeńimen qaıta bastadyq. 1 maýsymnan bastap halyqaralyq baǵyttardan ózge 226 avtobýs baǵyty qaıta jańardy. Sondaı-aq, maýsym aıynda jolaýshylar poıyzy úsh kezeńmen júre bastady. Sonymen qatar, mamyr aıynda FlyArystan avıakompanııasynyń oblysishilik Qaraǵandy-Jezqazǵan avıamarshrýty jáne Qaraǵandy-Almaty, Qaraǵandy-Óskemen oblysaralyq avıaqatynasy iske qosyldy», - dep habarlady Nurlan Esentaev.

Sanıtarııalyq-epıdemıologııalyq jaǵdaıdyń kúrdeliligin jáne jalpy el boıynsha koronavırýspen syrqattanýdyń óskenin eskere otyryp, memlekettik komıssııa birqatar sheshim qabyldap, onyń ishinde jolaýshylar tasymaly boıynsha shekteý sharalaryn engizgen bolatyn.

Al 31 tamyzdan bastap karantın rejımin jeńildete otyryp, basqarma Qaraǵandy oblysynyń bas sanıtar dárigeriniń qaýlysynda kórsetilgen barlyq sanıtarlyq normalardy saqtaı otyryp, oblysishilik 202 marshrýtty jańartty.

Uıymdastyrýshysy mınıstrlik sanalatyn 24 oblysaralyq jáne 8 halyqaralyq reısten basqasy qaıta júre bastady.

Avtobýstar ekıpajy sanıtarııalyq is-sharalardy buljytpaı jasaıdy. Atap aıtqanda, árbir sońǵy pýnkte tutqalardy, oryndyqtardy dezınfektsııalap, sondaı-aq aýysym aıaqtalǵannan keıin avtobýs salonyn tolyq jýyp, dezınfektsııalaıdy.

Sondaı-aq, jalpy vagondardy tirkemesten oblysishilik temirjol baǵyttary qaıta jandandy.

«Sapany baqylaý organdary mobıldi top quramynda basqarma qyzmetkerlerimen birlesip, shekteý sharalary engizilgen sátten bastap jolaýshylar kóligine sanıtarııalyq qaýipsizdik talaptaryn saqtaý turǵysynan tekserý júrgizýde. 5 shildeden bastap qazirgi ýaqytqa deıin qoǵamdyq kóliktiń 31 jelilik qyzmetkeri ákimshilik jaýapkershilikke tartyldy. Temirjol jáne áýe kóligi salasynda da reıd júrgizilýde», - dep túsindirdi kólik jáne avtomobıl joldary basqarmasy bastyǵynyń orynbasary Nurlan Esentaev.

Búgingi kúni kóliktegi SES organdary mobıldi toptardyń quramynda temirjol jáne áýe kóligi obektilerine jospardan tys 18 tekserý júrgizdi.

Onyń qorytyndysy boıynsha pandemııa kezeńinde sanıtarlyq erejelerdi buzǵany úshin 2 laýazymdy tulǵa jáne 23 jeke tulǵa ákimshilik jaýapkershilikke tartyldy.

Kólik kásiporyndary qyzmetkerleriniń sanıtarlyq talaptardy saqtaý máselesi baqylaýda tur.