Qaraǵandy oblysynda 20-dan astam búırekten tas alý operatsııasy tegin jasaldy

QARAǴANDY. QazAqparat – Qaraǵandy oblysynda búırek tastaryn alyp tastaý boıynsha operatsııalar qoljetimdi bola tústi. Jyl basynan beri dárigerler osyndaı 24 hırýrgııalyq ota jasaǵan, dep habarlaıdy QazAqparat tilshisi.

Óńirde mundaı operatsııalar perkýtandy nefrolıtotrıpsııa kómegimen jasalady. Bul búırek tastaryn, sonyń ishinde marjan tárizdi shógindilerdi joıýdyń óte tıimdi jáne jaraqatsyz ádisteriniń biri. Operatsııa kezinde hırýrgtar arnaıy jabdyq – nefroskopty búırek qýysyna teri arqyly engizedi. Tas lazer arqyly usaq bólshekterge bólinedi, sodan keıin olar alynady.

«Bul ádis búırekke teri arqyly jasalýymen erekshelenedi. Tilik 1 santımetrden aspaıdy. Operatsııanyń bul túrin jasaý úshin biz nefroskop satyp aldyq. Bul jabdyq tinderdiń jaraqattanýyn azaıtýǵa múmkindik beredi. Mundaı medıtsınalyq qyzmetke qajettilik boldy, sondyqtan biz ony halyqqa qoljetimdi ettik», – deıdi № 1 kópsalaly aýrýhana dırektorynyń orynbasary Dmıtrıı Matıýshko.

Qaraǵandylyq Quralaı Aıtkenovanyń búıreginen tastar bir jyl buryn tabylǵan.

Áıel operatsııany bel tusynyń aýrýy tózimsiz jaǵdaıǵa jetkenshe keıinge qaldyra bergen. Osy jyldyń qazan aıynda ol jedel járdemmen aýrýhanaǵa jetkizildi.

Operatsııa barysynda onyń búıreginen 1,3 santımetrlik tas alynyp tastaldy.

«Operatsııadan keıin 5 kún ótken soń meni úıge shyǵardy. Qazir densaýlyq jaǵdaıym jaqsy, esh jerim aýyrmaıdy. Operatsııa, barlyq tekserýler, sonyń ishinde ÝDZ, KT tegin, jyldam boldy», – deıdi qaraǵandylyq.

Búırek tastaryn perkýtandy nefrolıtotrıpsııa ádisimen joıý operatsııasyn barlyǵy bes medıtsınalyq uıym júzege asyrady. Olar MÁMS paketine kiredi jáne saqtandyrylǵan patsıentter úshin tegin.

Jyl basynan beri oblys hırýrgtary perkýtandy nefrolıtotrıpsııa ádisimen 24 adamǵa ota jasady. Árbir operatsııany tóleýge medıtsınalyq saqtandyrý qorynan 425 myń teńge bólindi.