Qaraǵandy oblysynda 2 500 jobaǵa qoldaý kórsetiledi

QARAǴANDY. QazAqparat - Qaraǵandy oblysynyń ákimi Jeńis Qasymbek «Saryarqa» telearnasynyń tikeleı efırinde pandemııa kezinde bıznesti qoldaý týraly aıtyp berdi, dep habarlaıdy QazAqparat tilshisi.

Osy qıyn kezeńde bıznesti qoldaý boıynsha kóptegen suraqtar týyndaýda. Pandemııa naryqtan rezervteri joq shaǵyn kásiporyndardyń ketýi, óndiristik baılanystardyń úzilýi jáne jumyssyzdyqtyń ósý qaýpin týdyrdy.

«Sondyqtan bizdiń basty mindetimiz - jaǵdaıdy turaqtandyrý jáne daǵdarystan tezirek shyǵýǵa baǵyttalǵan barlyq sharalardy qabyldaý», - dedi oblys ákimi.

Búgingi tańda memlekettik baǵdarlamalar arqyly 31,4 mlrd teńge ınvestıtsııa somasyna 830 bıznes-jobaǵa qoldaý kórsetildi. Jalpy, bıyl 8 myńǵa jýyq jumys ornyn asha otyryp, 2 500 jobaǵa qoldaý kórsetý josparlanýda.

Daǵdarysqa qarsy sharalar sheńberinde bıznes-úderisterdi turaqtandyrý úshin Qaraǵandy oblysynyń 30 myńnan astam sýbektisi salyqtar, ekinshi deńgeıli bankterdiń nesıeleri, jaldaý aqysy jáne kommýnaldyq ótemaqy boıynsha tólemder keıinge qaldyryldy.

Jumyspen qamtý jol kartasy aıasynda bıyl 16 myń jumys ornyn ashý josparlanýda. Bul maqsatqa 63,7 mlrd teńge qarastyrylǵan. Búgingi kúni oblys kásipkerlerimen 620 shart jasaldy jáne iske asyrylyp jatqan ınfraqurylymdyq jobalarda 10,5 myń jumys orny quryldy, onyń 5,2 myńy jumyspen qamtý ortalyqtarynyń joldamalary boıynsha.