Qaraǵandy oblysynda 18 myń adam gazdyń qosylýyn kútip otyr

ASTANA. QazAqparat – Qaraǵandy oblysynyń ákimi Ermaǵanbet Bólekpaev óńir turǵyndaryn gazben qamtý úshin qandaı jumystar júrgizilip jatqanyn aıtty, dep habarlaıdy QazAqparat tilshisi.

Búgin Úkimet otyrysynda Premer-Mınıstr Álıhan Smaıylov óńir basshysynan:

«Sizderde halyqtyń gazǵa qosylý deńgeıi tómen. Búginde qosylǵan abonentter sany ne bári 3 myń adamdy qurap otyr. Al kútip otyrǵan abonentterdiń sany budan 6 ese kóp. Qandaı is-shara qabyldaısyzdar?», - dep suraǵan edi.

Ermaǵanbet Bólekpaevtyń aıtýynsha, oblysta, Qaraǵandy jáne Temirtaý qalalarynda salynǵan gaz taratý jelileri 5 800 jeke turǵyn úıge jetizilgen.

Búgingi kúnge deıin jeke tulǵalar úshin 1 300 tehnıkalyq shart berildi. Ol degenimiz - 22 paıyz.

«Birinshiden, halyqtyń áleýmettik osal toptary úshin áleýmettik tólemder bólindi. Búginde 102 adam osyndaı tólem aldy. Bul jumysy jalǵasyp jatyr. Ekinshiden, Eýrazııalyq jáne Halyq bankteri arqyly turǵyndarǵa paıyzsyz nesıe berý tetigi qoldanylyp jatyr. Úshinshiden, osy yldyń mamyr aıynan bastap oblystyń turǵyn úı-kommýnaldyq sharýashylyǵyn damytý ortalyǵy arqyly 120 sharshy metrge deıingi jeke turǵyn úıler úshin 5 jyl merzimge paıyzsyz qaıtarymdy qarajat bólinedi. Munyń bári turǵyn úılerdi gazdandyrýdy edáýir arttyrýǵa múmkindik beredi», - dedi oblys basshysy.