Qaraǵandy oblysynda 174 eldi mekendi sý basý qaýpi bar
QARAǴANDY. QazAqparat – Qaraǵandy oblysynyń qutqarýshylary sý tasqynyna belsendi daıyndalýda. Olar qandaı sharalar qoldanatynyn jáne sınoptıkter aldaǵy ýaqytqa qandaı boljamdar berip otyrǵanyn Tótenshe jaǵdaılar departamentinde ótken brıfıngte málim etti, dep habarlaıdy QazAqparat.
2019 jyly qutqarýshylar 27 qorǵanys bógetterin nyǵaıtyp, 12 km drenajdy jáne sý burý kanaldaryn saldy. Eldi mekenderden 1 mln 800 myń tekshe metr qar shyǵaryldy.
«Qaraǵandy oblysy ákiminiń tapsyrmasy boıynsha sý tasqynyna qarsy is-sharalar jospary ázirlendi. Qazir kóktemge daıyndyqqa jaýapty barlyq memlekettik organdar soǵan sáıkes jumys isteýde. TJD qyzmetkerleri osy tapsyrmalardy oryndaýǵa barynsha jaýapkershilikpen qaraıdy, sebebi sý tasqyny kezeńiniń ótýi bizge baılanysty», - dedi Qaraǵandy oblysy TJD bastyǵynyń orynbasary Murat Qatpanov.
Qazir oblysta sý basý qaýpi joǵary 174 eldi meken anyqtaldy. Olardyń barlyǵy ózen arnalarynyń boıynda jáne sý qoımalarynyń janynda ornalasqan. 15 naýryzdan bastap atalmysh eldi mekenderdiń árqaısysynda táýlik boıy qutqarýshylar kezekshilik etetin bolady.
«Sý basý qaýpi kezinde biz júkti áıelderdi, sozylmaly aýrýlary bar naýqastardy, qart adamdar men balalardy aldyn ala kóshiremiz. Barlyq aýyl jáne kent ákimderinde olardyń tizimderi bar. Eger sý kelse, onda bizde evakýatsııalaý tehnıkasy daıyn tur. Kóshirilgen adamdardy ýaqytsha ornalastyrý úshin 231 pýnkt tolyǵymen jabdyqtalǵan», - dedi Murat Qatpanov.
Ol sondaı-aq sý tasqyny qaýpi bar eldi mekenderdiń turǵyndary sý basý kezindegi is-qımyl algorıtmimen tanys ekenin atap ótti. Olarmen túsindirý jumystary júrgizilip, jadynamalar taratylady.
Qazgıdromettiń boljamynsha, naýryz aıynda ortasha temperatýra normadan bir gradýsqa joǵary bolady. Oblys aýmaǵynda kúndizgi ýaqytta naýryzdyń ekinshi onkúndiginde kún jylıdy. Túnde termometr baǵanasy aı sońyna qaraı nólden joǵary kóteriledi.
