Qaraǵandy oblysynda 174 eldi mekendi kóktemde sý basýy múmkin

QARAǴANDY. QazAqparat – Qaraǵandy oblysynyń sý tasqyny qaýpi bar ýchaskelerine áýeden baqylaý júrgizilip jatyr. Aǵymdaǵy jaǵdaıdy baǵalaý maqsatynda Qaraǵandy oblysy TJD bastyǵynyń orynbasary Aqylbek Ahmetjanov Qaraǵandy, Temirtaý qalalary men Buqar jyraý aýdanynyń sý tasqyny qaýpi bar ýchaskelerine áýeden tekserý júrgizdi, dep habarlaıdy QazAqparat tilshisi.

Ushý barysynda Samarqand jáne Fedorov sý qoımalaryna, Soqyr ózeniniń arnasyna, Chkalovo, Salonıchkı, Rabochıı, Ǵ.Mustafın atyndaǵy eldi mekenderdiń qorǵanys bilikteriniń jaı-kúıine aerovızýaldy tekserý júrgizildi.

Ushý qorytyndysy boıynsha belsendi balqý protsesteri baıqalmaǵany, ózen arnalarynda turaqty muz qatý baıqalatyny anyqtaldy.

Qaraǵandy oblysynyń aýmaǵynda sý tasqyny qaýpi bar 174 eldi meken erekshe baqylaýǵa alyndy.

Ótken 2020 jyly Qaraǵandy oblysynyń 33 eldi mekeni aýmaǵynda 22 km-den astam qorǵaý bógetteri men dýaldary turǵyzyldy jáne nyǵaıtyldy, ózen arnalarynyń sý tasqyny qaýpi bar ýchaskelerin 12 km tereńdetý, jaǵalaýdy nyǵaıtý, tazalaý jáne keńeıtý júrgizildi.

9 km sý burý arnalaryn salyndy jáne jóndeldi, 65,5 km drenaj jáne sý burý júıeleri tazartyldy, 74 ýchaskedegi sý ótkizý qabileti joǵarylatyldy.

2015-2020 jyldar aralyǵynda oblysta barlyǵy 220 km qorǵanys bógenderi men bilikteri turǵyzylyp, nyǵaıtyldy, 173 eldi mekende 76 km ózen jaǵalaýlaryn nyǵaıtý, túbin tereńdetý, túzetý jáne keńeıtý oryndaldy.

«Búgingi kúni oblystyń barlyq óńirlerinde qar shyǵarý, materıaldyq-tehnıkalyq quraldar qoryn qurý, tasqyn qaýpi bar eldi mekender men avtomobıl jáne temir jol ýchaskeleriniń daıyndyǵyn tekserý boıynsha belsendi jumys júrgizilýde. Oblysta sý tasqyny qaýpi jáne týyndaýy kezinde basqarý organdarynyń is-qımyl algorıtmi ázirlendi. Halyq úshin TJ qaýpi jáne týyndaýy kezindegi is-qımyldar boıynsha arnaıy usynymdar ázirlendi. Sý tasqynyna daıyndyq máselesi kúndelikti baqylaýda», - dep habarlady Qaraǵandy oblysynyń TJD baspasóz qyzmeti.