Qaraǵandy oblysynda 170-ten astam bilim mekemesinde jóndeý jumystary júrip jatyr

QARAǴANDY. QazAqparat – Qaraǵandy oblysynda aldaǵy oqý jylyna belsendi daıyndyq júrip jatyr. Bıyl 175 bilim berý nysany jóndeýden ótip jatyr, onyń 32-si kúrdeli jóndeýden ótýde. Barlyq jumystar 25 tamyzǵa deıin aıaqtalýy tıis, dep habarlaıdy QazAqparat tilshisi.

Jóndeý jumystary úsh baǵyt boıynsha júrgizilip jatyr. Olar: jalpy sıpattaǵy transfertter esebinen, «Aýyl – El besigi» arnaıy jobasy aıasynda jáne jergilikti bıýdjetten bólingen qarajat esebinen.

Osy jyldyń qyrkúıek aıynan bastap Qaraǵandy oblysynda 405 mektep jumys isteı bastaıdy. Partaǵa 17 myńnan astam birinshi synyp oqýshylary otyrady.

Jańa oqý jylynda 11a yqsham aýdanynyń oqýshylaryn jańa mektep qabyldaıdy. Sondaı-aq qyrkúıek aıyna qaraı Temirtaýdaǵy 12-shi mektep ǵımaratyn qaıta jańǵyrtý aıaqtalady.

Oqýshylardy oqýlyqtarmen qamtamasyz etý máselesi tolyǵymen sheshildi.

Mektepteri joq oblystyń shalǵaı eldi mekenderinde oqýshylardy tasymaldaý uıymdastyrylady.

27 mektepke deıingi uıym da jóndelýde. Oblysta barlyǵy 36 823 oryndyq 415 balabaqsha men shaǵyn ortalyq bar.

«Jańa oqý jylynda óńirde 54 kolledj jumys isteıdi, onyń ishinde 36 – memlekettik, 18 – jekemenshik. Bıyl jergilikti bıýdjetten orta býyn mamandaryn jáne qoldanbaly bakalavrıatty, jumysshy kadrlardy, medıkterdi daıarlaýǵa memlekettik bilim berý tapsyrysynyń kólemi 3,2%-ǵa ulǵaıdy. Sonymen qatar, «Bilimdi ult» sapaly bilim berý baǵdarlamasy boıynsha myń oryn bólindi», - dep habarlady bilim basqarmasynda.

4 shildeden bastap sanıtarııalyq-epıdemıologııalyq baqylaý departamentimen monıtorıngtik toptardyń obektilerdiń jańa oqý jylyna daıyndyǵyn tekserý boıynsha birlesken jumysy bastaldy.