Qaraǵandy oblysynda 1500 gektar jerdi sharpyǵan dala órti sóndirildi
QARAǴANDY. QazAqparat – Qaraǵandy oblysynyń órt sóndirýshileri aýqymdy dala órtin sóndirdi. Tilsiz jaý 1500 gektardan astam alqapqa jaıylyp ketken, dep habarlaıdy QazAqparat tilshisi.
Búgin tańerteń saǵat 07:00-de Aqtoǵaı aýdanynda 14 maýsymda bastalǵan iri dala órti sóndirildi. Apattyń jalpy aýmaǵy 1500 gektardy qurady. Jalynmen kúresýge TJ departamentiniń bólimsheleri, «Orman jáne janýarlar dúnıesin qorǵaý jónindegi Aqtoǵaı orman sharýashylyǵy» KMM jáne órtke qarsy erikti qurylymdar qatysty.
Sonymen qatar, ótken táýlikte Qaraǵandy oblysynda Qaraǵandy orman sharýashylyǵy aýmaǵynda 1 orman órti jáne Buqar jyraý, Aqtoǵaı, Shet, Ulytaý aýdandarynda 8 dala órti joıyldy. Olardyń aýdany 2-den 49 gektarǵa deıin boldy. Órtti sóndirýge TJ departamentiniń kúshteri men órtke qarsy erikti qurylymdar jumyldyryldy.
Orman órti Kúzembaev atyndaǵy shahta mańynda da paıda boldy. Jalpy aýdany 1,8 ga quraıtyn aýmaqta qurǵaq shóp pen aǵashtar janǵan.
«Órt qaýpi artatyn kezeń bastalǵannan beri oblysta 87 dala órti tirkelgen. Olardyń jalpy aýdany 3500 ga quraıdy», - dep málimdedi TJD baspasóz qyzmeti.
