Qaraǵandy oblysynda 15 sport nysany salynady
QARAǴANDY. QazAqparat - Aldaǵy eki jylda Qaraǵandy oblysynda 15 iri sport nysany paıda bolady, qoldanystaǵy kóshe sport alańdaryn jóndeý jáne ornatý boıynsha aýqymdy naýqan ótedi. Bul týraly tikeleı efırde dene shynyqtyrý jáne sport basqarmasynyń basshysy Temirhan Abylaev aıtty, dep habarlaıdy QazAqparat tilshisi.
Buqaralyq sportty damytý - memlekettiń basym mindetteriniń biri. Qaraǵandy oblysynda adamdardy barynsha kóp salaýatty ómir saltyna tartý úshin dene shynyqtyrý-saýyqtyrý keshenderi, sport zaldary jáne ashyq sport alańdary salynýda.
«Óńirde aldaǵy eki jylda 15 iri sport nysany ashylady. Olardyń qatarynda Temirtaýdaǵy DSK, Qaraǵandydaǵy úlken jáne ústel tennısi ortalyqtary, Jezqazǵan, Shahtınsk qalalaryndaǵy jáne basqa da eldi mekenderde sport keshender bar. Sondaı-aq, aýyldarda «Aýyl-el besigi» baǵdarlamasy boıynsha sport nysandarynyń qurylysy júrgizilýde. Atasý kentinde basseın, Aqtas pen Botaqarda DSK ashý josparlanýda», - dedi Temirhan Abylaev.
Jańa nysandar salýdan basqa, óńirde burynnan bar nysandardy aýqymdy jóndeý jumystary júrip jatyr. Mysaly, Aqsý-Aıýly kentinde sport mektebi retke keltirildi, Qaraǵandyda «Qaraǵandy-Arena» muz saraıynda jóndeý jumystary júrgizildi. Munda shatyr, júgirý joldary aýystyrylyp, sheshinetin bólmeler men basqa da bólmeler retke keltirildi. Jol kartasy boıynsha jóndeý jumystary 11 nysandy qamtydy, olardyń ishinde sport saraıy da bar. Núrken Ábdirov atyndaǵy sport saraıy, jeńil atletıkadan olımpıadalyq rezervtiń mamandandyrylǵan balalar men jasóspirimder mektebi jáne basqalar.
