Qaraǵandy oblysynda 14 otbasy jańa páterdiń kiltin aldy

QARAǴANDY. QazAqparat – Qaraǵandy oblysynyń Nura aýdanynda kezekte turǵan 14 otbasy kópten kútken baspanaǵa ıe boldy. Nura kentiniń jańa shaǵyn aýdanyndaǵy úıler «Nurly jer» memlekettik baǵdarlamasy boıynsha salyndy, dep habarlaıdy QazAqparat tilshisi.

Qanaǵat Smaǵulova on jyl boıy páter alý kezeginde turdy. Kúıeýi qaıtys bolǵannan keıin, ol úsh balasyn jalǵyz asyrap keledi. Osy jyldar ishinde turǵyn úıdi jalǵa alyp turǵan.

«Osy jyldar ishinde úlken balalarym ósip úlgerdi. Biraq, men memlekettiń kómeginen úmit úzbedim. Óıtkeni, men satýshynyń jalaqysyna páter satyp ala almaımyn. Mine, meniń armanym oryndaldy. Maǵan úsh bólmeli páter berdi. Jóndeý jaqsy, bólmeler jaryq, maǵan bári unaıdy», - dedi Qanaǵat Smaǵulova.

Jańagúl Malǵajdarova bes balany jalǵyz tárbıelep otyr. Úlken balasy 14, al eń kishisi 2,5 jasta. Aıtýynsha, ol turǵyn úı kezeginde toǵyz jyl turǵan. Otbasy úsh bólmeli páter aldy.

Jańa qonystanýshylarǵa kiltterdi Nura aýdanynyń ákimi Aıan Shalmaǵanbetov tabystady. Ol qonys ıelerine jańa úılerde baqyt pen amandyq tiledi.

«Jańa úıler «Nurly jer» memlekettik baǵdarlamasy boıynsha salyndy. Merdigermen 20 úıdiń qurylysyna kelisimshart jasaldy. Olardyń 17-si tapsyryldy, biz olardy kemshilikter men aqaýlar joıylǵan kezde kezekte turǵandar arasynda bóldik. Merdiger taǵy úsh úıdi mamyr aıynyń sońyna deıin tapsyrýǵa mindetteldi», - dep atap ótti Nura aýdanynyń TKSh bóliminiń basshysy Nurjan Oralbaev.

Búgingi kúni Nura aýdanynda turǵyn úı alý kezeginde 442 adam tur.

Buǵan deıin óńir basshysy Jeńis Qasymbektiń Qaraǵandy turǵyndarymen kezdeskeni týraly jazyldy.