Qaraǵandy oblysynda 123 myń adam koronavırýsqa qarsy vaktsına aldy
QARAǴANDY. QazAqparat – 4 mamyrdaǵy jaǵdaı boıynsha Qaraǵandy oblysynda 123 671 adam koronavırýstyq ınfektsııaǵa qarsy vaktsınanyń birinshi komponentin aldy. Ekinshi doza aımaqtyń 21 904 turǵynyna egildi. Bul rette oblys burynǵysynsha «qyzyl» aımaqta qalyp otyr, dep habarlaıdy QazAqparat tilshisi.
Óńirlik kommýnıkatsııalar qyzmeti alańynda ótken brıfıngte Densaýlyq saqtaý basqarmasynyń basshysy Gamal Toqsambaev epıdemıologııalyq jaǵdaı týraly aıtyp berdi.
Qaraǵandy oblysynda kún saıyn koronavırýstyq ınfektsııany juqtyrýdyń 200-den 250-ge deıin jaǵdaıy tirkeledi. Pandemııa bastalǵannan beri aımaqta 24 myńnan astam adam KVI-men aýyrdy.
Úı oshaqtarynda ınfektsııanyń taralýynyń aldyn alý úshin táýlik boıy baqylaýǵa barlyq juqtyrǵan patsıentter alynady. Olardyń arasynda asımptomatıkalyq jáne aýrýdyń jeńil aǵymy bar adamdar bar. 288 mobıldi brıgadanyń qyzmetkerleri patsıentterdiń jaǵdaıyn baqylaıdy, sondaı-aq alǵashqy medıtsınalyq-sanıtarlyq kómek kórsetedi.
«Biz 4 819 tósek-oryndy konservatsııaladyq, onyń ishinde 1 667-si jumys isteıdi. Jan saqtaý bólimshelerde 72 qaraǵandylyq bar. Kóbinese bul 65 jastan asqan adamdar», – dep habarlady Gamal Toqsambaev.
Vaktsınatsııa naýqany oblysta 1 aqpannan bastap bastaldy. Barlyq qalalar men aýdandarda 115 ımmýndaý kabıneti jumys isteıdi. Jumys kúnderi jumys isteıtin segiz iri saýda ortalyǵynda egý kabınetteri ashyldy.
Oblys turǵyndaryn Qaraǵandy farmzaýytynda reseılik tehnologııa boıynsha óndiriletin «Spýtnık V» jáne qazaqstandyq QazVac preparatymen vaktsınatsııalaıdy. Sondaı-aq, aımaqqa qytaılyq Sinopharm vaktsınasy keldi.
«Barlyq qajetti saqtyq sharalaryn saqtańyzdar. Vaktsınatsııa salǵyzý qorǵanys kepili. Immýndaý erikti jáne tegin júrgiziledi» – dedi Gamal Toqsambaev.
