Qaraǵandy oblysynda 1200 shaqyrymnan astam jol jóndeledi
Joldardy jóndeý jáne salý týraly Qaraǵandy oblysynyń jolaýshylar kóligi jáne avtomobıl joldary basqarmasynyń basshysy Sábıt Ospanov Óńirlik kommýnıkatsııalar qyzmeti platformasynda ótken brıfıngte aıtyp berdi.
Qaraǵandy – Balqash jáne Balqash – Býrylbaıtal avtojoldaryn qaıta jańartý jumystary qarqyndy júrip jatyr.
Indýstrııa jáne ınfraqurylymdyq damý mınıstrligi men «Qazavtojol» ulttyq kompanııasynyń derekterine saı, bıyl bul joldarda qozǵalys tolyqtaı iske qosylady. Jańǵyrtý jumystary 2023 jyly tolyq aıaqtalady.
«Qaraǵandy – Jezqazǵan baǵyty boıynsha búgingi tańda uzyndyǵy 513 km joldy rekonstrýktsııalaýǵa joba-smetalyq qujattar ázirlenip jatyr. Bıyl osy baǵyt boıynsha Qarqaraly qalasynyń mańynda 10 km ortasha jóndeý jáne Botaqara kenti aýdanyn jaryqtandyrý qarastyrylǵan», – dep habarlady Sábıt Ospanov.
Budan basqa, «Qazavtojol» Qaraǵandy fılıalynyń aqparaty boıynsha, 2023 jylǵa Mataq – Qarqaraly ýchaskesinde 74 km ortasha jóndeý josparlanǵan.
Oblystyq mańyzy bar joldarǵa keletin bolsaq, Novodolınka – Shahan – Molodetskoe avtojolynyń 17 shaqyrymyn qaıta jańartýdy aıaqtaý josparlanyp otyr. Osakarovka – Molodejnoe baǵyty boıynsha 16 km jańa jabyn tóselip, joba 2023 jyly tolyǵymen bitedi.
Úshtóbe – Qurylys avtojolynyń 9 shaqyrymynda qaıta jańartý jumystary júrgizilip jatyr. Qarabas – Jartas – Dolınka avtojolynda uzyndyǵy 21 km ýchaske jóndeledi.
«Nura – Shahterskoe – Prjevalskoe avtojolynyń ýchaskesin qaıta qalpyna keltirý aıasynda 20 km jańa jabyn boıymen qozǵalys qamtamasyz etiledi. Nura jáne Osakarovka kentteriniń arasyndaǵy qaıta qurý ýchaskesinde aýqymdy jumystar kózdelgen. Jóndeý jumystarymen 20 km jol qamtyldy», – dedi Sábıt Ospanov.
Buqar Jyraý aýdany Ǵabıden Mustafın kentiniń janyndaǵy Nura ózeni arqyly ótetin kópirdiń jobasyn túzetý aıaqtalý satysynda. Mamandar qurylys-qurastyrý jumystaryna bıyl kirisedi.
Sondaı-aq, «Aýyl – el besigi» arnaıy jobasy aıasynda Aqtoǵaı jáne Shet aýdandarynyń 12 km kentishilik joldaryn jóndeýge qarajat bólindi. Seksen shaqyrym jol «Nurly jol» memlekettik baǵdarlamasy boıynsha jóndeledi.
Oblys ortalyǵynda Maıqudyq (k. Marks jáne Magnıtogorskaıa kósheleri) joly men 7-magıstraliniń kúrdeli jóndeýi aıaqtalady.
Spıker jol jóndeý jumystarynyń sapasyna erekshe nazar aýdarylatynyn atap ótti.
Sondaı-aq, oblysta qoǵamdyq kólik jańartylady. Bıyl Qaraǵandyda 100 jańa avtobýs, Temirtaýda – 70, Balqashta – 7 qoǵamdyq kólik satyp alý josparlanýda.