Qaraǵandy oblysynda 12 myń jumys orny ashylady - ákim
Ákim Memleket basshysyna turǵyn úı-kommýnaldyq sharýashylyǵy men áleýmettik salalarda atqarylyp jatqan jumystardyń jaı-kúıi, ınvestıtsııa tartý isi, ónerkásip jáne aýyl sharýashylyǵy óndirisiniń qarqyny týraly málimet berdi
Ermaǵanbet Bólekpaev 53 iri jobany júzege asyrý qolǵa alynǵanyn, nátıjesinde 12 myń jumys orny ashylatynyn aıtty.
Onyń aıtýynsha, oblysta shaǵyn jáne orta bıznes sýbektileriniń sany artyp keledi.
«Jergilik organdar quny 18 mıllıard teńge bolatyn 5,5 myń jobany qarjylandyryp 5,8 myń jumys ornyn ashýdy josparlap otyr. Sonymen qatar byltyr óńirde 597,2 myń sharshy metr turǵyn úı paıdalanýǵa berildi. Aýyl sharýashylyǵy salasynda ótken jyly 1,2 mıllıon gektardan astam jer qaıtaryldy. Bıyl ıgerilmeı jatqan 580 myń gektar jerdi qaıtarý josparlanyp otyr» delingen ákim baıandamasynda.
Memleket basshysyna áleýmettik saladaǵy josparlar jóninde baıandaldy. Atap aıtqanda, aýyldyq eldi mekenderde 92 medıtsına nysany salynady, aýyldyq jerlerdegi densaýlyq saqtaý salasyn jańǵyrtý aıasynda 2 aýdanaralyq aýrýhana qurylady.
Sondaı-aq, Qaraǵandy medıtsına ýnıversıteti janynan 300 oryndyq klınıka men 200 oryndyq perınataldyq ortalyq salý qarastyrylǵan.
Oblysta 2023–2025 jyldar aralyǵynda 18 zamanaýı mektep salynýǵa tıis.
Kezdesý sońynda Qasym-Jomart Toqaev oblystardyń ákimderine byltyr óńirlerge jumys sapary barysynda bergen tasyrmalary ýaqytyly ári sapaly oryndalýǵa tıis ekenin aıtty. Sondaı-aq óńirlerdiń ornyqty áleýmettik-ekonomıkalyq damýyn odan ári qamtamasyz etýdi jáne azamattardyń turmys sapasyn jaqsartý jumystaryn jalǵastyrýdy tapsyrdy.
