Qaraǵandy oblysynda 12 mln teńgeniń munaı ónimin jymqyrǵandar ustaldy
QARAǴANDY. QazAqparat – Qaraǵandy oblysynda quny 12 mıllıon teńgege jýyq munaı ónimin qoldy qylǵan aýyl turǵyndary ustaldy, dep habarlaıdy QazAqparat Polisia.kz-ke silteme jasap.
Temirtaý qalalyq polıtsııa basqarmasyna qarasty Shyǵys polıtsııa bólimine munaı ónimderin kóterme jetkizýmen aınalysatyn jaýapkershiligi shekteýli seriktestiktiń basshylyǵy aryzdandy. Belgili bolǵandaı, atalǵan seriktestik janar-jaǵarmaı satý stantsııasymen munaı ónimderin satyp alý kelisimshartyna qol qoıǵan.
Býhgalterlik esep-qısap júrgizý barysynda 11 mıllıon 893 myń teńge aqsha jetispeıtini anyqtalǵan. Krımınaldyq polıtsııa qyzmetkerlerimen júrgizilgen keshendi jedel-izdestirý is-sharalary barysynda osy iske qatysy bar degen kúdikpen 23 pen 40 jas aralyǵyndaǵy eki aýyl turǵyny ustaldy. Olar moıyndaý kórsetpe belgilerin berdi.
Atalǵan derek boıynsha Qazaqstan Respýblıkasy QK-niń 188-babyna sáıkes qylmystyq is qozǵaldy. Tergeý amaldary júrgizilip jatyr.