Qaraǵandy oblysynda 12 adam tamaq jep ýlanǵan dóner dúńgirshegi jabyldy
QARAǴANDY. QazAqparat - Qaraǵandy oblysynda 10-nan astam adam dóner dúńgirsheginen doner satyp alyp, ýlanǵannan keıin osy saýda orny tekserildi. Búginde bul dúńgirshektiń qyzmeti toqtatylǵan, dep habarlaıdy «QazAqparat» HAA tilshisi.
Qaraǵandy oblysy boıynsha Qoǵamdyq densaýlyq saqtaý departamentiniń aqparatynsha, dóner dúńgirshegin jospardan tys tekserý jumystarynyń qorytyndylary boıynsha, birqatar zań buzýshylyqtar anyqtalǵan: dúńgirshekte ystyq sý, dezınfektsııalyq quraldar, óndiristik baqylaýdyń bekitilgen baǵdarlamasy bolǵan joq, shıkizat pen daıyn ónimdi saqtaý kezinde «taýarlyq kórshilestik» erejeleri saqtalmaǵan, sapasyn rastaıtyn qujattary joq taǵamdyq ónim qoldanylǵan, sondaı-aq qyzmetkerleri medıtsınalyq tekserýden ýaqtyly ótpegen.
Zerthanalyq zertteýler boıynsha, dúńgirshekte patogendik mıkroflora (1-Salmonella interitidis, 3 - Rroteus mirabilis) anyqtaldy, bul onda sanıtarlyq normalardyń saqtalmaǵanyn bildiredi.
Vedomstvoda atap ótkendeı, medıtsınalyq tekserýden merziminde ótpegen bir qyzmetkerdi ýaqytsha jumystan shettetý týraly jáne nysanda sanıtarlyq-epıdemııaǵa qarsy sharalardy ótkizý týraly qaýly shyǵarylǵan. 24 qazan kúni jeke kásipker dóner dúńgirsheginiń qyzmetin toqtatty.
Budan basqa, aǵymdaǵy jyldyń 1 qarashasynda Abaı aýdany Qoǵamdyq densaýlyq saqtaý basqarmasy Qaraǵandy oblysynyń Mamandandyrylǵan aýdanaralyq ekonomıkalyq sotyna dónerhananyń qyzmetin toqtatý týraly aryz shaǵym jiberdi.
Eske sala keteıik, 22-24 qazan kúnderi aralyǵynda Qaraǵandy oblysynyń Abaı qalasynda 12 adam medıtsınalyq kómekke júgingen, sonyń ishinde 8 adam (arasynda bir bala) aýrýhanaǵa jatqyzyldy. Olarǵa «ótkir ishek ınfektsııasy» dıagnozy qoıyldy. Medıtsınalyq kómek surap kelgen barlyq qalalyq azamattardyń jergilikti dónerhanadan tamaqtanǵany anyqtaldy. Atalǵan fakti boıynsha qylmystyq is qozǵaldy.
