Qaraǵandy oblysynda 1 mln tonnadan astam shóp orylǵan

QARAǴANDY. QazAqparat - Qaraǵandy oblysynda jem-shóp daıyndaý naýqany jalǵasýda. Qazirgi tańda 1 mln 17 myń tonna shóp orylǵan, ol qajetti normanyń 51%-nan asady, dep habarlaıdy QazAqparat oblys ákiminiń baspasóz qyzmetine silteme jasap.

Barlyq sharýa qojalyqtaryn mol azyqpen qamtamasyz etý úshin 2 mıllıon 125 myń tonna shóp qajet. Ol úshin oblysta 19,4 myń gektar jerge bir jyldyq shóp egilgen. Sonymen qatar, mal azyǵyn kópjyldyq ósimdikterden de ázirleıdi. Búginde kópjyldyq shóp aýmaǵy 326,1 myń gektardy quraıdy. Qoımada jatqan taǵy 432 myń tonna jem-shóp ótken jyldan qalǵan. 

«Belgilengen azyq qoryn tıisti ýaqyt ishinde daıyndap úlgerý úshin 6867 tósem, 528 destelegish, 2,2 myń tyrnaýysh pen 316 syǵymdap jınaýysh jumyldyrylǵan», - deıdi aýyl sharýashylyǵy basqarmasynyń basshysy Saǵynjan Apaqashov. 



Belgilengen normany oryndaý úshin kún saıyn kem degende 32 myń tonna shóp orylýy tıis. Kóktemniń kesh túsýine jáne aýa-raıynyń qolaısyzdyǵyna baılanysty barlyq aımaqtar kesteden qalyp barady. Aımaq basshysy Erlan Qoshanov qala men aýdan ákimderine osy baǵyttaǵy jumysty údetýdi tapsyrdy. 

«Bylaı qaraǵanda, shóp jınaý maýsymynyń aıaqtalýyna nebary bir aı ýaqyt qaldy. Meni alańdatyp otyrǵan bir suraq - sizder osynshama az ýaqytta qajetti mólsherdi jınap úlgeresizder me? Biz baıaǵyda 50 paıyzdy eńserýge tıis edik», - dedi oblys ákimi.