Qaraǵandy oblysynda 1 aqpanǵa deıin qoǵamdyq densaýlyq qyzmetteri qurylmaq

ASTANA. QazAqparat - Qaraǵandy oblysynyń ákimi Erlan Qoshanov medıtsınalyq-sanıtarlyq kómekti damytý boıynsha tapsyrmalar berdi, dep habarlaıdy óńirlik ákimdiktiń baspasóz qyzmeti.

«QR Prezıdenti Nursultan Nazarbaev aldyn alý sharalaryn údetý arqyly medıtsınalyq kómekti jaqsartý boıynsha naqty tapsyrmalar qoıdy. Bizge aldaǵy ýaqytqa alǵashqy medıtsınalyq-sanıtarlyq kómekti ári qaraı damytýǵa basymdylyq jasaý qajet. Otbasylyq densaýlyq ortalyqtarynyń jelilerin damytý kerek», - dedi Erlan Qoshanov Elbasynyń «Tórtinshi ónerkásiptik revolıýtsııa jaǵdaıynda jańa múmkindikterdi damytý» Qazaqstan halqyna Joldaýynda alǵa qoıylǵan mindetter men maqsattaryn talqylaýǵa arnalǵan aktıv jınalysynda.

Ol mysal retinde Qaraǵandyda memlekettik-jekemenshik seriktestik sheńberinde ashylǵan otbasylyq densaýlyq ortalyǵyn keltirdi.

«Bul tájirıbeni ári qaraı jalǵastyrýymyz qajet. Densaýlyq saqtaý basqarmasymen jáne qala men aýdandardyń ákimderimen bir aptalyq merzim ishinde oblysymyzdyń aımaqtarynda otbasylyq densaýlyq ortalyqtaryn damytý boıynsha egjeı-tegjeıli jobalary usynalatyn bolsyn, - dep tapsyrma berdi aımaq basshysy. - Oblysymyzdyń barlyq emhanalarynda qoǵamdyq densaýlyqty qorǵaý qyzmetterin, jastar densaýlyǵy ortalyqtaryn damytý qajet. Osy oraıda Densaýlyq saqtaý basqarmasyna 1-shi aqpanǵa deıin Qoǵamdyq densaýlyq saqtaý qyzmetin qurýdy jáne kezeń-kezeńmen barlyq alǵashqy medıtsınalyq-sanıtarlyq kómek uıymdarynda fılıaldar uıymdastyrýdy tapsyramyn».

Sonymen qatar oblysta ǵalymdardyń qatysýymen onkologııalyq derttermen kúres boıynsha jańa Keshendik jospar qurylatyn bolady.