Qaraǵandy oblysynan Messaǵa 350-den astam katolık arnaıy kelgen
«Men Qaraǵandydan Rım Papasynyń qatysýymen ótetin qasıetti Messaǵa qatysý úshin keldim. Katolıkterdiń shirkeýi álemniń ár túkpirinde bar. Rım Papasyn kórý múmkindigi bárimizdi osy jerde toǵystyryp otyr. Biz úshin katolık shirkeýiniń basshysymen birge Messaǵa qatysý erekshe syı deýge bolady», - dedi katolık dininiń ókili.
Aıtýynsha, ol bul kúnge óte tııanaqty daıyndalypty.
«Birinshi kezekte ózimizdi rýhanı turǵyda daıyndadyq. Sodan keıin baryp sapardy uıymdastyrýmen aınalystyq. Óıtkeni Qaraǵandydan qulshylyq etýshiler top bolyp keldi. Munda osy sharaǵa bizdiń oblystan arnaıy kelgen 350-den astam adam júr. Men úshin bul Rım Papasynyń qatysýymen ótetin alǵashqy Messa. Tanystarymnyń arasynda osyndaı sharaǵa qatysý úshin Vatıkanǵa arnaıy barǵan adamdar bar. Men de buǵan deıin Rım Papasyn kórgenmin. Biraq ol ótkizetin Messaǵa birinshi ret qatysqaly turmyn», -deıdi Sofııa Gotovskaıa.
Aıta ketý kerek, eki kúnge sozylatyn sezge 50 elden 100-den astam delegatsııa, onyń ishinde ıslam, hrıstıan, býddızm, ıýdaızm, ındýızm, daosızm, zoroastrızm, sıntoızm dinderiniń ókilderi, sondaı-aq saıasatkerler men qoǵam qaıratkerleri, halyqaralyq uıym músheleri kelgen.
Dinı forýmǵa arnaıy qonaq Rım Papasy Frantsıskten bólek Ál-Azhardyń Joǵarǵy ımamy Ahmed Mohammed Ahmed at-Taıeb, Ierýsalım Patrıarhy III Teofıl, Ashkenazdyń bas ravvıni Davıd Laý, Izraıldiń Bas sefard ravvıni Itshak Iosıf jáne basqa da dinı jetekshiler, birqatar halyqaralyq uıymnyń ókilderi qatysady.
Keshe keshke Prezıdent Qasym-Jomart Toqaev sezdiń arnaıy qonaǵy Rım Papasy Frantsıskti elorda áýejaıynan kútip aldy.
Keıinnen Qazaqstan Prezıdenti men Rım Papasy azamattyq qoǵam jáne dıplomatııalyq korpýs ókilderimen kezdesti.
Kezdesýde katolık shirkeýiniń basshysy Qazaqstannyń ólim jazasynan bas tartqanyna joǵary baǵa berip, Qazaqstan Konstıtýtsııasynyń nanym-senim bostandyǵynyń kepili ekenin atady.
Din kóshbasshysy Frantsısktiń elimizge memlekettik sapary Rım Papasy Ioann II Pavel Qazaqstanǵa 2001 jyly kelgennen keıin alǵash ret ótip jatyr. Búgin ol elordada messa ótkizedi. Oǵan 3 myńǵa jýyq adam qatyspaq.
Vıdeodan alynǵan kadr
